ރާއްޖޭގެ ކަނޑުގެ ސަރަހައްދުގައި ގަވާއިދާއި ހިލާފަށް މަސްވެރިކަން ކުރަމުން ދިޔަ ބޭރުގެ މަސްބޯޓެއް އަތުލައިގެންފި

ރާއްޖޭގެ ކަނޑުގެ ސަރަހައްދުގައި ގަވައިދާ ހިލާފަށް ހަރަކާތްތެރިވަމުން ދިޔަ ބޭރުގެ މަސްބޯޓެއް އަތުލައިގެންފި އެވެ.

އެމްއެންޑީއެފުން ބުނީ ރާއްޖޭގެ ކަނޑުގެ ސަރަހައްދުގައި ގަވައިދާ ހިލާފަށް މަސްވެރިކަން ކުރާ ކަމަށް ތުހުމަތުކުރެވޭ ބޭރުގެ މަސްބޯޓެއް އެމްއެންޑީއެފް ކޯސްޓްގާޑުން އަތުލައިގެންފައިވާ ކަމަށެވެ.

އެކަމާއި ގުޅޭ އިތުރު ތަފްސީލެއް އަދި މިހާތަނަށް ސިފައިން ހާމަކޮށްފައި ނުވާއިރު ސިފައިން ވަނީ އެބޯޓުގެ ފޮޓޯއެއް އާންމުކޮށްފައެވެ.

ފޮޓޯއިން ފެންނަ ގޮތުގައި އެމަސްބޯޓަކީ މީގެ ކުރިންވެސް ރާއްޖޭގެ ކަނޑުގެ ސަރަހައްދުން ގަވާއިދާ ހިލާފަށް މަސްވެރިކަން ކުރަމުން ދަނިކޮށް އަތުލައިގެންފައިވާ މަސްބޯޓުތަކާއި ދާދި އެއްގޮތް މަސްބޯޓެކެވެ.

ރާއްޖޭގެ ކަނޑުގެ ސަރައްހަދު ބެލެހެއްޓުމަށް ސިފައިން މިހާރު ދަނީ ޚާއްސަ މަސައްކަތްތަކެއް ކުރަމުންނެވެ. އެގޮތުން ދާދި ފަހުންވެސް ސިފައިންގެ ޑްރޯންއަކުން ވަނީ ރާއްޖޭގެ ކަނޑުގެ ސަރަހައްދުގައި ގަވާއިދާ ހިލާފަށް ހަރަކާތްތެރިވަމުން ދިޔަ މަސްބޯޓެއް އަތުލައިގެންފައި އެވެ.