އޭސީސީއާއި އީސީގެ 5 މެމްބަރަކު ވަކިކުރަން ކޮމެޓީން ފާސްކޮށްފި

އެންޓި-ކޮރަޕްޝަން ކޮމިޝަން (އޭސީސީ) އާއި އިލެކްޝަންސް ކޮމިޝަން (އޭސީ) ގެ 5 މެމްބަރަކު ވަކިކުރަން ރައްޔިތުންގެ މަޖިލީހުގެ ކޮމިޓީއިން މިއަދު ފާސްކޮށްފި އެވެ.

މި ނިންމުން ނިންމީ މިއަދު ސިއްރުކޮށްގެން ކުރިޔަށް ގެންދިޔަ މިނިވަން މުއައްސަސާތާކުގެ ކޮމިޓީންނެވެ. މި ކޮމިޓީގެ މިއަދު ބައްދަލުވުން ފެށުމުން ކޮމިޓީ ސިއްރުކޮށްގެން ކުރިއަށް ގެންދިއުމަށް ހުށަހެޅުއްވީ ކެލާ ދާއިރާގެ މެންބަރު އަބްދުﷲ ޝަރީފެވެ. އެ ހުށަހެޅުމަށް ތާއީދު ކުރެއްވީ ކޮލަމާފުށީ ދާއިރާގެ މެންބަރު އިބްރާހިމް ދީދީއެވެ.

ސިއްރުކޮށްގެން ބޭއްވި މަޖިލީހުގެ މިނިވަން މުއައްސަސާތަކުގެ ކޮމިޓީގެ ބައްދަލުވުމުގައި މަގާމުން ވަކިކުރަން ފާސްކުރީ އޭސީސީގެ ނައިބު ރައީސް އަބްދުއްސަލާމާއި މެންބަރު ތޯހާ މުހައްމަދުގެ އިތުރުން އީސީގެ ނައިބު ރައީސް އަލީ ނަޝާތާއި މެންބަރުން ކަމަށްވާ ޑރ. މުހައްމަދު ޒާހިރާއި މުހައްމަދު އާސިފެވެ.

މިއަދު ކޮމެޓީގައި ސިވިލް ސާވިސް ކޮމިޝަން (ސީއެސްސީ) ގެ ރައީސް މުހައްމަދު ނާސިހު ވަކިކުރުމުގެ މައްސަލަ ވެސް ދިރާސާ ކޮށްފައިވާއިރު, ކޮމިޓީން ނިންމީ އޭނާ ވަކި ނުކުރުމަށެވެ.

އީސީގެ ނައިބު ރައީސާއި މެންބަރުންތަކެއް ސުލޫކީ މިންގަނޑާ ހިލާފަށް އަމަލުކޮށްފައިވާ ކަމަށް ތުހުމަތުކޮށް މިނިވަން މުއައްސަސާތަކުގެ ކޮމިޓީއަށް މިދިޔަ މަހުގެ 22 ގައި މައްސަލައެއް ހުށަހަޅާފަ އެވެ. އޭސީސީގެ ނައިބު ރައީސް އަބްދުއްސަލަމާ ތޯހާ ވަކިކުރަން ހުށަހެޅީ އޭސީސީގެ ގާނޫނުގެ 17 ވަނަ މާއްދާގެ ހ. އަދި ށ. އާ ހިލާފަށް އަމަލުކޮށްފައިވާ ކަމަށް ތުހުމަތުކޮށް މިނިވަން މުއައްސަސާތަކުގެ ކޮމިޓީއަށް ލިބިފައިވާ ދެ މައްސަލައަކާ ގުޅިގެންނެވެ.

ކޮމެޓީން މިއަދު ނިންމުމަށް މާދަމާ މަޖިލީހުގެ ޖަލްސާގައި މަޖިލިސް ތަޅުމުގައި ވޯޓު ނެގާނެ ކަމަށް ބެލެވެއެވެ.

މީގެ އިތުރުން، މިނިވަން މުއައްސަސާތަކާ ބެހޭ ކޮމިޓީން ވަނީ، އީސީ އާއި އޭސީސީގެ ވެރިން އައްޔަންކުރުމުގެ ބާރު ސީދާ ރައީސުލްޖުމްހޫރިއްޔާ އަށް ދޭ ގޮތަށް ސަރުކާރުން ހުށަހެޅި އިސްލާހުތަކަށް އުނިއިތުރެއް ނުގެނެސް ފާސްކުރަން ފެންނަ ކަމަށް މިދިޔަ ބުދަ ދުވަހު ނިންމައިފައެވެ. މިކަމަށްވެސް މާދަމާ މަޖިލިސް ތަޅުގައި ވޯޓަށް އަހާނެ ކަމަށް ބެލެވެއެވެ.