ކުލަ ފާޓާތަކެއް ބަންޑުންވެ "ކުލަ ލެވުނު" މާގު ސާފުކުރުމުގައި ސިފައިން!

މާލޭގައި ޕިކަޕެއްގައި އުފުލި ކުލަ ފާޓާތަކެއް މަގުމައްޗަށް ބަންޑުންވެ މަގަށް އެޅުނު ކުލަ ސާފުކުރުމުގައި ސިފައިން ހަރަކާތްތެރިވެއްޖެ އެވެ.

ސިފައިން މިރޭ ބުނީ ކުލަފާޓާތަކެއް ބަރުކޮށްގެން ދިޔަ ޕިކަޕަކުން މާލޭގެ މަގަކަށް ކުލަ ފާޓާތަކެއް ވެއްޓި މަގުމައްޗަށް ކުލައެޅުމާ ގުޅިގެން، މަގުމަތީގައި ހުރި ކުލަތައް ސާފުކުރުމުގައި އެމްއެންޑީއެފް ފަޔަރ އެންޑް ރެސްކިޔު ސަރވިސްގެ ސިފައިން ހަރަކާތްތެރިވެފައިވާ ކަމަށެވެ.

ސޯޝަލް މީޑިއާގައި ދައުރުވާ ވީޑިއޯއިން ފެންނަ ގޮތުގައި އޭގެ ތެރެއިން ބައެއް ފާޓާތައް ފަޅައިގެން ގޮސް މުޅި މަގުގައި އޮތީ "ކުލަލެވިފަ" އެވެ. އަދި އެ ސަރަހައްދުގައި ހުރި ސައިކަލުތަކަށް ވެސް ވަނީ ކުލަ އެޅިފަ އެވެ.

މައުލޫމާތު ލިބިފައިވާ ގޮތުގައި މި ހާދިސާ ހިނގީ މާލޭގެ މާވެޔޮމަގާއި ކޯރުކެނޑި މަގާ ގުޅޭ ހިސާބުގައި އެވެ. ކުލަ ފާޓާތައް މަގުމައްޗަށް ބަންޑުންވީ އެސަރަހައްދުގައި ހުރި ގުދަނަކަށް އެތަކެތި ބާލަނިކޮށް ކަމަށް މައުލޫމާތު ލިބެއެވެ.