ނާޒުކު ހާލަތްތަކުގައި ދިރިއުޅޭ ފަރާތްތަކަށް އެހީތެރިކަން ފޯރުކޮށްދިނުމުގެ މަސައްކަތް ފަށައިފި

އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއާއި އެހީ ޖަމުޢިއްޔާއާއި، ވ އަތޮޅު ކައުންސިލާއި ގުޅިގެން އެ އަތޮޅުގައި ނާޒުކު ހާލަތްތަކުގައި އަދި ދަތި ހާލަތްތަކުގައި ދިރިއުޅޭ ފަރާތްތަކަށް އެހީތެރިކަން ފޯރުކޮށްދިނުމުގެ މަސައްކަތް ފަށައިފިއެވެ.

އެހީ ޖަމުޢިއްޔާއާއި މި ވުޒާރާއާއެކު ހަދާފައިވާ ފަހުމުނާމާގެ ދަށުން، ވ އަތޮޅު ކައުންސިލްގެ އެހީތެރިކަމާއެކު ދަތިހާލުގައި އުޅޭކަމަށް އެ ކައުންސިލުން ދެނެގަނެފައިވާ ޢާއިލާތަކަށް ދާއިމީ ބޯހިޔާވަހިކަން ހޯދައިދިނުމުގެ ޕްރޮގްރާމެއް މިހާރު ވަނީ ފެށިފައެވެ.

ވ.އަތޮޅު ކައުންސިލްގެ ބައިވެރިވުމާއެކު ކުރިއަށްދާ މި ޕްރޮގްރާމުގެ ދަށުން މި ޢާއިލާގެ އިތުރުން ވ.އަތޮޅުގައި ދަތިހާލުގައި ދިރިއުޅޭ އިތުރު ޢާއިލާތަކުގެ ދިރިއުޅުމުގެ ހާލަތު ދެނެގަނެ، ދެވެން ހުރި އެހީތެރިކަން ދިނުމުގެ މަސައްކަތް ކުރުމަށް މަޝްވަރާތައް ވެސް މިހާރު ވަނީ ކުރެވިފައެވެ.

ދަތި ހާލުގައި އުޅޭ ފަރާތްތަކަށް އެހީތެރިކަން ފޯރުކޮށްދިނުމާއި، އެމީހުންގެ ހާލަތު ރަނގަޅުކުރުމަށް ކުރެވޭ ކޮންމެ މަސައްކަތަކީ ސަރުކާރުގެ ކަމާ ބެހޭ މުއައްސަސާތަކާއި، އިޖުތިމާޢީ ޚިދުމަތްތެރިންނާއި، ދަރުމަވެރިންނާއި، އާންމު ފަރުދުންގެ ހިއްސާއާއެކު ކުރެވޭނެ މަސައްކަތެއްކަން ފާހަގަކުރުމާއެކު، މި ވުޒާރާއާއި އެހީ ޖަމުޢިއްޔާ އަދި ވ އަތޮޅު ކައުންސިލުން މި ފެށި މަސައްކަތުގައި ބައިވެރިވެ އެހީތެރިކަން ފޯރުކޮށްދީ މިފަދަ ކަންކަމުގައި ބައިވެރިވުމަކީ ވަރަށް މުހިންމު ކަމެއްކަން މި ވުޒާރާއިން ފާހަގަކުރަމެވެ.