އެމްއެމްއޭގެ މުވައްޒަފެއްގެ ޒާތީ މައުލޫމާތުތަކެއް ލީކްވި މައްސަލައެއް ބަލަނީ

ރާއްޖޭގެ މަރުކަޒީ ބޭންކު ކަމަށްވާ މޯލްޑިވްސް މަނިޓަރީ އޮތޯރިޓީ, އެމްއެމްއޭގެ މުވައްޒަފެއްގެ ޒާތީ މަައުލޫމާތުތަކެއް ލީކުވި މައްސަލައެއް ބަލަން ފަށައިފި އެވެ.

އެމްއެމްއޭއިން މިއަދު ބުނީ މުވައްޒަފުންގެ ޒާތީ މައުލޫމާތަކީ އެ އޮތޯރިޓީން ރައްކާތެރިކުރަން ބޭނުންވާ މައުލޫމާތުތަކެއް ކަމަށާއި އެހެންކަމުން އެ މައުލޫމާތު ލީކުވި މައްސަލަ، އެމްއެމްއޭގެ އިންޓާނަލް އޮޑިޓުން ބަލަމުން އަންނަ ކަމަށެވެ.

މައުލޫމާތު ލިބޭގޮތުގައި މި މައްސަލައާއި ގުޅިގެން ފުލުހުން އަންނަނީ އެމްއެމްއޭއަށް މައްސަލަ ބެލުމަށް ފަންނީ އެހީތެރިކަމުގެ އިތުރުން ޖިނާއީ މައްސަލައެއްގެ ގޮތުގައި ތަހުގީގުވެސް ކުރަމުންނެވެ. މިކަން ފުލުހުންގެ ތަރުޖަމާނު އަހުމަދު ޝިފާން މިރޭ ވަނީ ބައެއް ނޫސްތަކަށް ކަށަވަރުކޮށްދީފައި އެވެ.

މައުލޫމާތު ލިބިފައިވާ ގޮތުގައި ފުލުހުންނާއި އެމްއެމްއޭގެ އިންޓާނަލް އޮޑިޓުން ތަހުގީގު ކުރަމުންދަނީ ދާދި ފަހުން " ހަސަން ކުރުސީ" ނަމަކަށް ކިޔާ ޓުވިޓާ އެކައުންޓަކުން އާންމުކުރި އެމްއެމްއޭގެ އަންހެން މުވައްޒަފެއްގެ މައުލޫމާތެވެ.