މެންބަރުންގެ ގޮނޑި ގެއްލޭ އިސްލާހު ކޮމިޓީން ފާސްކޮށްފި

ސަރުކާރުގެ ފަރާތުން ގާނޫނުއަސާސީއަށް ހުށަހަޅުއްވާފައިވާ އިސްލާހުތައް، އިތުރު އިސްލާހުތަކަކާ އެކު ރައްޔިތުންގެ މަޖިލީހުގެ މުޅި މަޖިލީހުގެ ކޮމިޓީން މިއަދު ފާސްކޮށްފިއެވެ.

ބިލު ކޮމެޓީން ފާސްކުރުމަށް ފެންނަ ކަމަށް ވޯޓު ދެއްވީ 75 މެންބަރުންނެވެ. ނުފެންނަ ކަމަށް ވޯޓުދެއްވީ 13 މެންބަރުންނެވެ. މުޅި މަޖިލީސް ކޮމެޓީގެ ވޯޓު ތަޅުމުގައި ނެގޯ ރޯލް ކޯލް ވޯޓެއްގެ ގޮތުގައި އެވެ. ރޯލްކޯލް ނުވަތަ ވަކިވަކިން މެމްބަރުންނާ ސުވާލުކޮށްގެން ނެގި މިވޯޓު އެގޮތަށް ނެގީ ވޯޓިން ސިސްޓަމްގައި މައްސަލަ ޖެހުމާ ގުޅިގެން ކަމަށް ރިޔާސަތުން ވަނީ އިއުލާނުކޮށްފައެވެ.

ސަރުކާރުގެ ފަރާތުން ގާނޫނުއަސާސީއަށް މި އިސްލާހު ހުށަހެޅުއްވީ ހުޅުދޫ ދާއިރާގެ މެންބަރު މުހައްމަދު ޝާހިދެވެ.

ކޮމިޓީން ނިންމި ގޮތް ތަޅުމުން ފާސްކުރަން މިއަދު ހަވީރު 5:30 އަށް ވަނީ މަޖިލީހުގެ ޖަލްސާއެއް ތާވަލުކޮށްފައެވެ.

މި ބިލްގައި ވާގޮތުން ނަމަ މަޖިލިސް މެމްބަރެއްގެ މެމްބަރު ކަން ގެއްލޭނެ ހަތަރު ހާލަތެއް ގާނޫނު އަސާސީން ކަނޑައަޅާނެ އެވެ. އެ ހަލާތްތަކަކީ އަމިއްލަ މެންބަރަކު ޕާޓީއަކާ ގުޅުމާއި އިންތިހާބުވި އިރު ހުރި ޕާޓީ ނޫން އެހެން ޕާޓީއަކަށް ބަދަލުވުމާއި އިންތިހާބުވި ޕާޓީން މެމްބަރަކު ވަކިވުމުގެ އިތުރުން ޕާޓީން އެ މެމްބަރަކު ވަކިކުރުމެވެ.

ސަރުކާރުގެ ފަރާތުން ގާނޫނުއަސާސީ އަށް ހުށަހެޅި މި އިސްލާހާ ގުޅިގެން، ސަރުކާރަށް ސަޕޯޓްކުރާ ޕީއެންސީގެ އެކްޓިވިސްޓުންނާއި އިދިކޮޅު އެމްޑީޕީގެ އެކްޓިވިސްޓުން ދަނި މަޖިލިސް ދޮށަށް އެއްވެ އަޑު އުފުލަމުންނެވެ.