ގާނޫނު އަސާސީއަށް ގެންނަ ގޮނޑި ގެއްލޭ އިސްލާހު ފާސްކުރުން މިއަދު ހަވީރު!

ޕާޓީ ބަދަލުކުރުމުން މެންބަރުންގެ ގޮނޑި ގެއްލޭ ގޮތަށް ގާނޫނުއަސާސީއަށް ހުށަހަޅާފައިވާ އިސްލާހަށް ވޯޓަށް އެހުން މިއަދު ހަވިރަށް ތަވާލުކޮށްފި އެވެ.

ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއަށް އިސްލާހު ހުށަހަޅުއްވާފައިވަނީ ސަރުކާރުގެ ފަރާތުން ހުޅުދޫ ދާއިރާގެ މެންބަރު މުހައްމަދު ޝާހިދު އެވެ. ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ މި ބިލުގެ ފުރަތަމަ ކިޔުން އިއްވާ، ބަހުސް ކުރިއަށް ގެންގޮސް ނިންމާލާފަ އެވެ. އަދި މައްސަލަ މިހާރު ކޮމެޓީއަށް ފޮނުވާފައިވާއިރު މި ބިލް ފާސްކުރުމަށް ވޯޓަށް އެހުމަށް ތާވަލުކޮށްފައިވަނީ މިއަދު ހަވިރު 17:30 ގައި އެވެ.

އެ ބިލުގެ ކޮމެޓީ މަރުހަލާގައި މެންބަރުން ވަނީ ބައެއް އިސްލާހުތައް ހުށަހަޅުއްވާފަ އެވެ. އެގޮތުން އެ އިސްލާހުތަކަށް ވޯޓު ނެގުމުގެ މަސައްކަތް މިހާރު ދަނީ ކުރިޔަށެވެ.

މި ބިލްގައި ވާގޮތުން ނަމަ މަޖިލިސް މެމްބަރެއްގެ މެމްބަރު ކަން ގެއްލޭނެ ހަތަރު ހާލަތެއް ގާނޫނު އަސާސީން ކަނޑައަޅާނެ އެވެ. އެ ހަލާތްތަކަކީ އަމިއްލަ މެންބަރަކު ޕާޓީއަކާ ގުޅުމާއި އިންތިހާބުވި އިރު ހުރި ޕާޓީ ނޫން އެހެން ޕާޓީއަކަށް ބަދަލުވުމާއި އިންތިހާބުވި ޕާޓީން މެމްބަރަކު ވަކިވުމުގެ އިތުރުން ޕާޓީން އެ މެމްބަރަކު ވަކިކުރުމެވެ.

ސަރުކާރުގެ ފަރާތުން ގާނޫނުއަސާސީ އަށް ހުށަހެޅި މި އިސްލާހާ ގުޅިގެން، ސަރުކާރަށް ސަޕޯޓްކުރާ ޕީއެންސީގެ އެކްޓިވިސްޓުންނާއި އިދިކޮޅު އެމްޑީޕީގެ އެކްޓިވިސްޓުން ދަނި މަޖިލިސް ދޮށަށް އެއްވެ އަޑު އުފުލަމުންނެވެ.