ތަޢުލީމީ ރޭވުންތެރިކަމާ ގުޅޭ ސަރަހައްދީ ކޮންފަރެންސެއްގައި ރާއްޖެއިން ބައިވެރިވެއްޖެ

ރީޖަނަލް ކޮންފަރެންސް އޮން އެޑިޔުކޭޝަން ޕްލޭނިންގ އިން އޭޝިއާ-ޕެސިފިކް 2024 ގައި ދިވެހިރާއްޖެއިން ބައިވެރިވެއްޖެއެވެ.

ދިވެހިރާއްޖޭގެ ފަރާތުން މި ކޮންފަރެންސްގައި ބައިވެރިވެ ވަޑައިގަތީ މިނިސްޓަރ އޮފް ސްޓޭޓް ފޮރ އެޑިޔުކޭޝަން ޑރ. އަޙުމަދު މުޙައްމަދެވެ.

ޔުނެސްކޯ އިންޓަނޭޝަނަލް އިންސްޓިޓިއުޓް ފޯ އެޑިއުކޭޝަނަލް ޕްލޭނިން (އައި.އައި.އީ.ޕީ) އިން އިންތިޒާމުކޮށްގެން ބޭއްވި މި ކޮންފަރެންސްގެ މަގުސަދަކީ އޭޝިއާ-ޕެސިފިޕް ސަރަހައްދުގައި ތަޢުލީމީ ދާއިރާގެ ރޭވުންތެރިކަމާއި ހިންގުންތެރިކަން އިތުރުކުރުމަށްޓަކައި އެންމެން ގުޅިގެން މަސައްކަތްކުރުމުގެ އެޖެންޑާއެއް އެކުލަވާލުމަށް ބޭއްވި ކޮންފަރެންސްއެކެވެ.

ފިލިޕީންސްގެ ވެރި ރަށް މެނީލާގައި މި މަހުގެ 5-7 އަށް ކުރިއަށް ދިޔަ މި ކޮންފަރެންސްގައި އަލިއަޅުވާލި ކަންކަމުގެ ތެރޭގައި ދިރާސާކުރުމާއި، ފަންނީ އެހީތެރިކަމާއި، ތަމްރީން ޕްރޮގްރާމްތައް މެދުވެރިކޮށް ތަޢުލީމީ ރޭވުންތެރިކަން ހަރުދަނާކުރުން ހިމެނެއެވެ.

މި ކޮންފަރެންސްގެ ތެރެއިން ކުރިއަށްދިޔަ 3 ވަނަ ރައުންޑްޓޭބަލް މަޝްވަރާތަކުގައި ސްޓޭޓް މިނިސްޓަރ ޑރ. އަޙުމަދު މުޙައްމަދު ބައިވެރިވެ ވަޑައިގެންނެވިއެވެ. މި މަޝްވަރާތަކުގައި ކުރިއަރަމުންދާ ކުޑަ ޤައުމުތަކުގެ ތަޢުލީމީ ނިޒާމުގައި މަސައްކަތްކުރައްވާ ބޭފުޅުންނަށް ދިމާވާ ގޮންޖެހުންތަކާއި އެކަންކަން ހައްލުކުރުމަށް ކުރެވިދާނެ ކަންކަމާމެދު ހިޔާލު ބަދަލުކުރެވުނެވެ.