ސާރާގެ ނަމުން ނަންދީފައިވާ ބާރުގަދަ ތޫފާނަކާއި އެކު ވަރުގަދަ ވިއްސާރައެއްގެ އިންޒާރު އެމެރިކާ ބައްރަށް!

ކެރީބިއަން ކަނޑުގައި އުފެދިފައިވާ ބާރުގަދަ ތޫފާނެއް އެމެރިކާ ބައްރާ ދިމާލަށް ދަތުރުކުރަމުންދާކަމަށް ބޭރުގެ ރިޕޯޓުތައް ބުނެފި އެވެ.

އެމެރިކާގެ ނޭޝަނަލް ހަރިކޭން ސެންޓަރު (އެންއެޗްސީ) އިން ބުނީ މޫސުމީ ވަރުގަދަ ވިއްސާރައެއް ކުރިމަތިވެދާނެ ކަމަށް ލަފާކުރެވޭ ތޫފާން " ސާރާ " އެމެރިކާ ބައްރުގެ މެދުތެރެއަށް އަރައި ބޮޑެތި ގެއްލުންތަކެއް ދީފާނެ ކަމުގެ ބިރު އޮތް ކަމަށެވެ.

އެގޮތުން ތޫފާނުގެ މިސްރާބު ހުރި ގޮތުން ތޫފާނުގެ އަސަރު އެމެރިކާއަށާއި މެކްސިކޯއަށްވެސް ކުރާނެ ކަމަށް އެ އިދާރާއިން ވަނީ ލަފާކޮށްފައެވެ.

އެމެރިކާގެ ނޭޝަނަލް ހަރިކޭން ސެންޓަރު (އެންއެޗްސީ) އިން ބުރާސްފަތި ދުވަހު ލަފާކުރާ ގޮތުގައި ކުރިއަށް އޮތް ދުވަސްތަކުގައި މި ތޫފާން އެމެރިކާ ބައްރުގެ މެދުގައި އޮންނަ ހޮންޑިއުރަސްއަށް އަރައި ފެންބޮޑުވެ ބިންގަނޑު ކަނޑައިގެން ދިއުމުގެ ފުރުސަތު އެބައޮތެވެ.

ޓްރޮޕިކަލް ތޫފާން ސާރާގެ ނަމުން ނަންދީފައިވާ މި ތޫފާން ބުރާސްފަތި ދުވަހު ނިކަރާގުއާ އާއި ހޮންޑިއުރަސްގެ އިރުމަތީ އައްސޭރިފަށާ ގާތްގަނޑަކަށް 85 ކިލޯމީޓަރު (50 މޭލު) ދުރުގައި ހުރިއިރު، ވިލާގަނޑުގައި ގަޑިއަކު ގާތްގަނޑަކަށް 65 ކިލޯމީޓަރު (40 މޭލު) ބާރުމިނުގައި ވައި ޖެހެމުންދާ ކަމަށް އެންއެޗްސީ އިން ބުނެއެވެ.

ތޫފާން ސާރާ, ހުޅަނގުން ހޮންޑިއުރަސްއާ ދިމާލަށް ދަތުރުކުރަމުން އަންނައިރު މިއީ އެމެރިކާ ބައްރަށް އަރާ ސީޒަންގެ 19 ވަނަ ތޫފާނެވެ.