ނޫސްތަކާއި މީޑިއާތައް ކޮންޓްރޯލް ކުރުމަކީ ގަބޫލުކުރާ ހަމައެއް ނޫން - ރައީސް

ނޫސްތަކާއި މީޑިއާތައް ކޮންޓްރޯލް ކުރުމަކީ ގަބޫލުކުރާ ހަމައެއް ނޫން ކަމަށް ރައީސް ޑރ މުހައްމަދު މުއިއްޒު ވިދާޅުވެއްޖެ އެވެ.

ރައީސް މިފަދައިން ވިދާޅުވީ މޯލްޑިވްސް މީޑިއާ ކައުންސިލް (އެމްއެމްސީ) އާއި މޯލްޑިވްސް ބްރޯޑްކާސްޓިން ކޮމިޝަން (އެމްބީސީ) އުވާލުމަށްފަހު ސަރުކާރަށް ކޮންޓްރޯލް ލިބޭ ގޮތަށް މީޑިއާ ކޮމިޝަނެއް އުފެއްދުމަށް މިއަދު މަޖިލީހަށް ބިލެއް ހުށަހަޅާފައިވާ ދަނޑިވަޅެއްގައި އެވެ. މި ބިލް މަޖިލީހަށް ހުށަހެޅުއްވީ ތުޅާދޫ ދާއިރާގެ މެމްބަރު އަބްދުލްހަންނާނު އަބޫބަކުރު އެވެ.

މި ބިލް މަޖިލީހަށް ހުށަހެޅި އަބްދުލްހަންނާނު އަބޫބަކުރު އަކީ މިނިވަން މެމްބަރެއް ނަމަވެސް މި ބިލަކީ ވެރިކަން ކުރާ ޕީއެންސީގެ ބެކިންގ އާއި އެކު މަޖިލީހަށް ހުށަހަޅާފައިވާ ބިލެއް ކަމަށް ގިނަ ބަޔަކު ދަނީ ތުހުމަތު ކުރަމުންނެވެ.

މި ބިލާއި ގުޅިގެން ގިނަ ނޫސްވެރިންތަކެއް ކަންބޮޑުވުން ފާޅުކުރަމުންދަނިކޮށް މިރޭ އެކްސްގައި ރައީސް މުއިއްޒު ކުރެއްވި ޕޯސްޓެއްގައި ވިދާޅުވީ ނޫސްތަކާއި މީޑިއާ ތައް ކޮންޓްރޯލް ކުރުމަކީ އެމަނިކުފާނު ޤަބޫލުކުރާ ހަމަޔެއްނޫން ކަމަށެވެ. އަދި މާތް ވެގެންވާ އިސްލާމްދީނާއި ދިވެހިރާއްޖޭގެ ޤާނޫނު އަސާސީ އާއި ޚިލާފު ނުވާހާ ހިނދަކު ދިވެހި ދައުލަތުގެ ސިޔާދަތީ ބާރު ހިނގާ ސަރަޙައްދުގައި ކޮންމެ ދިވެއްސަކަށްވެސް އެމީހެއްގެ އަމިއްލަ މިނިވަންކަމާއެކު އެމީހަކު ބޭނުންކަމެއްކޮށް އުޅުމުގެ ޙައްޤު އޮންނާނެ ކަމަށް ރައީސް ވިދާޅުވިއެވެ.

މިއަދު މަޖިލީހަށް ހުށަހެޅި ބިލްގައި ވާގޮތުން ނަމަ ބިލް އޮތީ ނޫސްވެރިންނާއި މީޑިއާތައް ޖޫރިމަނާކޮށް އަދި އެ ތަންތަނުގެ ލައިސެންސް ހިފެހެއްޓުމުގެ ބާރު މީޑިއާ ކޮމިޝަނަށް ލިބޭ ގޮތަށެވެ.