ނަތަންޔާހޫ ހައްޔަރުކުރަން ނެރުނު އަމުރަކީ ހަނގުރާމައިގެ ޖަރީމާތަކާއި އިންސާނިއްޔަތާ ޚިލާފު ޖަރީމާތަކަށް ޒިންމާދާރުކުރުވުމަށް އެޅުނު މުހިންމު ފިޔަވަޅެއް!

ނަތަންޔާހޫ ހައްޔަރުކުރަން ނެރުނު އަމުރަކީ ހަނގުރާމައިގެ ޖަރީމާތަކާއި އިންސާނިއްޔަތާ ޚިލާފު ޖަރީމާތަކަށް ޒިންމާދާރުކުރުވުމަށް އެޅުނު މުހިންމު ފިޔަވަޅެއްގެ ގޮތުގައި ރައީސް ޑރ މުހައްމަދު މުއިއްޒު ސިފަކުރައްވައިފި އެވެ.

ރައީސް މިފަދައިން ވިދާޅުވީ ރޭ ބައިނަލަގްވާމީ މައި ކޯޓު ކަމަށްވާ އިންޓަނޭޝަނަލް ކްރިމިނަލް ކޯޓު, އައިސީސީއިން އިޒްރޭލުގެ ބޮޑުވަޒީރު ބެންޖަމިން ނަތަންޔާހޫގެ އޯޑަރަށް ޣައްޒާއާއި މެދުއިރުމަތީގައި ހިނގަމުންދާ ގަތުލުއާންމާއި ދެކޮޅަށް އޭނާ ހައްޔަރުކުރުމަށް ނެރުނު އަމުރާއައި ގުޅިގެން އެކްސްގައި ކުރެއްވި ޕޯސްޓެއްގައި އެވެ.

އެގޮތުން ރައީސް ވަނީ އައިސީސީގެ އަމުރަށް މަރުހަބާ ދަންނަވާފައި އެވެ. އަދި އެ އަމުރަކީ ހަނގުރާމައިގެ ޖަރީމާތަކާއި އިންސާނިއްޔަތާ ޚިލާފު ޖަރީމާތަކަށް ޒިންމާދާރުކުރުވުމަށް އެޅޭ މުހިންމު ފިޔަވަޅެއް ކަމަށް ވިދާޅުވެފައި އެވެ. ރައީސް ވަނީ ރާއްޖެއިން އައިސީސީގެ ނިންމުމަށް އިޙުތިރާމު ކުރާ ކަން ހާމަކުރައްވައި އެ ކޯޓުގެ ނިންމުން ތަންފީޒުކުރުމުގެ މުހިންމުކަން ފާހަގަކުރައްވާފައި އެވެ.

އިޒްރޭލުން ފަލަސްތީނުގެ ގާޒާގައި ހިންގަމުންދާ ގަތުލްއާންމާއި ގުޅިގެން އައިސީސީން ރޭވަނީ ނަތަންޔާހޫގެ އިތުރުން އޭނާގެ ސަރުކާރުގެ ކުރީގެ ޑިފެންސް މިނިސްޓަރު ޔޮއާވް ގަލާންޓް ހައްޔަރުކުރަން ވެސް އަމުރެއް ނެރެފައި އެވެ.

ގަތުލުއާންމުތަކާއި އިންސާނިއްޔަތާ ހިލާފު ކުށްތަކާއި ހަނގުރާމައިގެ ކުށްތައް އަދި ގައުމުތަކަށް ފިޔަވަޅު ނޭޅޭ ނުވަތަ އަޅަން ބޭނުން ނުވާ މައްސަލަތައް ބަލާ އައިސީސީގެ މެމްބަރު ގައުމުތަކުގެ ތެރޭގައި އިޒްރޭލު ނުހިމެނެއެވެ.