ފަހުވަގުތު ކާމިޔާބުކުރި ޕެނަލްޓީއާއެކު ގަލަކްޓިކޯ ބަލިކޮށް ގުރޫޕްގެ އެއްވަނަ ހިޔާއަށް

މިހާރު ކުރިއަށްދާ ގައުމީ ހޭންޑްބޯޅަ މުބާރާތުގެ އަންހެން ދެވަނަ ޑިވިޝަން ގުރޫޕް ހައެއްގައި މިރޭ ކުޅުނު ދެވަނަ މެޗުގައި ހިޔާ ސްޕޯޓްސް ކުލަބާއި ގަލެކްޓިކޯ ވާދަކުރި މެޗުގެ އެންމެ ފަހުވަގުތު ކާމިޔާބުކުރި ލަނޑާއެކު 9-10 ގެ ނަތީޖާއަކު މޮޅުވެ ގުރޫޕްގެ އެއްވަނަ ޓީމުގެ ގޮތުގައި ހިޔާ މުބާރާތުގެ ކުއާޓާ ފައިނަލުން ޖާގަހޯދައިފިއެވެ.

މުބާރާތުގައި ގަލެކްޓިކޯ ކުޅުނު ފުރަތަމަ މެޗުގައި އީގަލްސް އަތުން 9-18 ގެ ނަތީޖައަކުން މޮޅުވިއިރު، ދެވަނަ މެޗުގައި ޓީރެކްސް އަތުން އެޓީމު މޮޅުވީ 16-10 ގެ ނަތީޖާއަކުންނެވެ. އަދި އެޓީމުގެ ތިންވަނަ މެޗުގައި ނައިސް އަތުން މޮޅުވީ 30-2 ގެ ތަފާތުބޮޑު ނަތީޖާއަކުންނެވެ.

މީގެ އިތުރުން ހިޔާގެ ފުރަތަމަ މެޗުގައި ނައިސް އަތުން 5-29 ގެ ނަތީޖާއަކުން މޮޅުވިއިރު، ދެވަނަ މެޗުގައި އީގަލްސް އަތުން އެޓީމު މޮޅުވީ 8-25 ގެ ތަފާތުބޮޑު ނަތީޖާއަކުންވެ. އަދި ތިންވަނަ މެޗުގައި އެޓީމުން ވަނީ 25-6 ގެ ތަފާތުބޮޑު ނަތީޖާއަކުން ޓީރެކްސް ބަލިކޮށްފައެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ އެއްލަނޑުގެ ލީޑަކާއެކު 5-6 ގެ ނަތީޖާއަކުން ގަލެކްޓިކޯ ކުރީގައި އޮވެގެންނެވެ. ނަމަވެސް ދެވަނަ ހާފުގައި ހިޔާ އިން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ.

ނަތީޖާއެއްގެ ގޮތުން ދެވަނަ ހާފުގައި ގަލެކްޓިކޯ އިން އިތުރު ތިން ލަނޑު ކާމިޔާބުކުރިއިރު، ހިޔާ އިން މިހާފުގައި ވަނީ އިތުރު ފަސް ލަނޑު ކާމިޔާބުކޮށްފައެވެ. އަދި ހިޔާ މިމެޗުން މޮޅުވި ލަނޑު ދެވަނަ ހާފުގެ އެނަމެ ފަހު މިނެޓުގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދިނީ މިމެޗުގެ މޮޅު ކުޅުންތެރިއާގެ މަގާމު ހޯދި މަރިޔަމް ޝަރީފާ ހުސެއިން އެވެ.

މިނަތީޖާއެކު ގުރޫޕް ސްޓޭޖުގައި ކުޅުނު ހަތަރު މެޗުން ވެސް މޮޅުވެ 12 ޕޮއިންޓާއެކު ގުރޫޕްގެ އެއްވަނަ ޓީމުގެ ގޮތުގައި ހިޔާ މުބާރާތުގެ ކުއާޓާ ފައިނަލުން ޖާގަހޯދައިއިރު، މިމެޗުން ބަލިވި ގަލެކްޓިކޯ ކުޅުނު ހަތަރު މެޗުން ލިބުނު ނުވަ ޕޮއިންޓާއެކު، ހަ ގުރޫޕުން ދެވަނަ ހޯދި ޓީމުތަކުގެ ތެރެއިން އެންމެ ރަނގަޅު ނަތީޖާހޯދި ދެޓީމުގެ ތެރޭގައި ހިމެނި އެޓީމަށް ވެސް ވަނީ ކުއާޓާ ފައިނަލުން ފުރުސަތު ލިބިފައެވެ.

މިއަހަރުގެ މުބާރާތުގެ އަންހެން ދެވަނަ ޑިވިޝަނުގައި 26 ޓީމަކުން ބައިވެރިވެފައިވާއިރު، މިޑިވިޝަނުގެ މެޗުތައް ކުރިއަށްދަނީ ބައިވެރިވި 26 ޓީމު ހަ ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ޓީމުގެ އިތުރުން ،ހަ ގުރޫޕްގެ ދެވަނަ ހޯދާ ޓީމުތަކުގެ ތެރެއިން އެންމެ ނަތީޖާ ރަނގަޅު ދެ ޓީމަށް ވެސް މުބާރާތުގެ ކުއާޓާ ފައިނަލުން ފުރުސަތު ލިބިގެންދާނެއެވެ.