ލ. ހުޅިމެންދޫގައި ހޮޓެލް ޓްރެއިނިން ސްކޫލެއް ތަރައްޤީކުރަން ސޮއިކޮށްފި

ހޮޓެލް ޓްރެއިނިން ސްކޫލަކާއި 5 ތަރީގެ ރިސޯޓެއް ތަރައްގީ ކުރުމަށް ޓޫރިޒަމް މިނިސްޓްރީއާއި ދިވެހިރާއްޖޭގެ ގައުމީ ޔުނިވާސިޓީ (އެމްއެންޔޫ) އާ ދެމެދު އެއްބަސްވުމެއްގައި ސޮއިކޮށްފި އެވެ.

މި އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ މިނިސްޓަރު އިބްރާހިމް ފައިސަލެވެ. އެމްއެންޔޫގެ ފަރާތުން އެ އެއްބަސްވުމުގައި ސޮއިކުރެއްވީ ވައިސް ޗާންސެލަރު ޑރ. އާއިޝަތު ޝެހެނާޒް އާދަމް އެވެ.

މި އެއްބަސްވުމުގެ ދަށުން ހޮޓެލް ޓްރެއިނިން ސްކޫލަކާއި 5 ތަރީގެ ރިސޯޓެއް ތަރައްގީ ކުރުމަށް ހަމަޖެހިފައިވަނީ ލ އަތޮޅުގައި ޕިކްނިކް އައިލެންޑެއްގައި ގޮތުގައި މިހާރު ބޭނުންކުރަމުން އަންނަ ލ ހުޅިމެންދޫގައި އެވެ. އެރަށް ތަރައްޤީކުރެވުމުގެ ސަބަބުން ހޮޓެލް މެނޭޖްމެންޓް ކިޔަވައިގެން ނިކުންނަ ދަރިވަރުންނަށް އަމަލީ ތަޖުރިބާއާއި އިންޓާންޝިޕް ފުރުސަތުރައް ފަހިވެގެން ދާނެކަމަށް ޓޫރިޒަމް މިނިސްޓްރީން ބުނެ އެވެ.

އެއްބަސްވުމުގައި ސޮއި ކުރެއްވުމަށްފަހު މިނިސްޓަރު ފައިސަލް ވިދާޅުވީ މިއީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް ކުރިއަށް ގެންދަވާ މަޝްރޫއެއް ކަމަށެވެ. އަދި މީގެ ސަބަބުން ދަރިވަރުންނަށް އަމަލީ ތަޖުރިބާ ލިބި ދާއިރާއާ ގުޅޭ ހުނަރުތައް ދަސްވެ ފަތުރުވެރިކަމުގެ ދާއިރާއަށް ވަނުމަށް ތައްޔާރުވެގެން ދާނެކަމަށް މިނިސްޓަރު ވިދާޅުވި އެވެ.

އެމްއެންޔޫގެ ފަރާތުން ޝެހެނާޒް ވިދާޅުވީ ޓްރެއިނިން ރިސޯޓަކީ ބައިނަލްއަގްވާމީ ފެންވަރުގެ ޓްރެއިނިން މަރުކަޒަކަށް ހެދުމުން ދުނިޔޭގެ ކަންކޮޅުތަކުން ދަރިވަރުންނާއި ދިރާސާވެރިން އެ މަރުކަޒަށް އަންނާނެ ކަމަށް ގަބޫލު ކުރެވޭ ކަމަށެވެ. އޭނަ ވިދާޅުވީ މިމަޝްރޫއު ކުރިއަށް ގެންދާނީ ހުޅިމެންދޫގެ ގުދުރަތީ ތިމާވެށި ރައްކާތެރި ކުރުމަށް ވަރަށް ބޮޑު އިސްކަންދީގެން ކަމަށެވެ.

ސަރުކާރުގެ އަމާޒަކީ ދެ އަހަރުގެ ތެރޭގައި އެތަނުގައި މަސައްކަތްތައް ފެށުމެވެ.