ފުލިދޫ އަތުން މޮޅުވެ އަސްދިޤާ އިން މުބާރާތް ނިންމާލީ މޮޅަކާއެކު

މިހާރު ކުރިއަށްދާ ގައުމީ ހޭންޑްބޯޅަ މުބާރާތުގެ އަންހެން ދެވަނަ ޑިވިޝަން ގުރޫޕް ދޭއްގައި މިރޭ ކުޅުނު ތިންވަނަ މެޗުގައި ފުލިދޫ ޔޫތު ސްޕޯޓްސް ކުލަބާއި އަސްދިޤާ ސްޕޯޓްސް ކުލަބު ވާދަކުރި މެޗު 12-2 ގެ ނަތީޖާއަކުން ކާމިޔާބުކޮށް އަސްދިޤާ އިން ކުއާޓާ ފައިނަލުގެ އުންމީދު ދަމަހައްޓައިފިއެވެ.

މުބާރާތުގައި އަސްދިޤާ ކުޅުނު ފުރަތަމަ މެޗުގައި ޒައިރޯ ސްޕޯޓްސް ކުލަބާއި ވާދަކޮށް 11-11 ގެ ނަތީޖާއަކުން ދެޓީމު އެއްވަރުވިއިރު، ދެވަނަ މެޗުގައި ވެސްޓް އެންޑް ސްޕޯޓްސް ކުލަބު އަތުން އެޓީމު ބަލިވީ 12-21 ގެ ނަތީޖާއަކުންނެވެ. އަދި ފުލިދޫގެ ފުރަތަމަ މެޗުގައި ވެސްޓް އެންޑް އަތުން 34-3 ގެ ތަފާތުބޮޑު ނަތީޖާއަކުން ބަލިވިއިރު، ދެވަނަ މެޗުގައި ޒައިރޯ އަތުން އެޓީމު ބަލިވީ 12-11 ގެ ނަތީޖާއަކުންނެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ އެއްލަނޑުގެ ލީޑަކާއެކު 3-2 ގެ ނަތީޖައަކުން އަސްދިޤާ ކުރީގައި އޮވެގެންނެވެ. އަދި ދެވަނަ ހާފުގައި އަސްދިޤާ އިން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ.

ނަތީޖާއެއްގެ ގޮތުން މިހާފުގައި އަސްދިޤާ އިން އިތުރު 10 ލަނޑު ކާމިޔާބުކުރިއިރު، ދެވަނަ ހާފުގައި ފުލިދޫއަށް އެންމެ ލަނޑެއްވެސް ކާމިޔާބުކުރެވިފައެއް ނުވެއެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ އަސްދިޤާގެ އައިޝަތު ލީން މުހައްމަދު އެވެ.

މިނަތީޖާއެކު ގުރޫޕް ސްޓޭޖުގައި ކުޅުނު ތިން މެޗުން އަސްދިޤާއަށް ހަތަރު ޕޮއިންޓް ލިބިފައިވާއިރު، ލަނޑުގެ ތަފާތުން އެޓީމު މިވަގުތު އޮތީ ގުރޫޕްގެ ދެވަނައިގައެވެ. އަދި މިމެޗުން ބަލިވި ފުލިދޫ އިން މުބާރާތް ނިންމާލީ ކުޅުނު ތިން މެޗުން ވެސް ބަލިވެ ޕޮއިންޓެއް ނުލިބި ގުރޫޕްގެ ފުލުގައި އޮވެއެވެ.

މިއަހަރުގެ މުބާރާތުގެ އަންހެން ދެވަނަ ޑިވިޝަނުގައި 26 ޓީމަކުން ބައިވެރިވެފައިވާއިރު، މިޑިވިޝަނުގެ މެޗުތައް ކުރިއަށްދަނީ ބައިވެރިވި 26 ޓީމު ހަ ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ޓީމުގެ އިތުރުން ،ހަ ގުރޫޕްގެ ދެވަނަ ހޯދާ ޓީމުތަކުގެ ތެރެއިން އެންމެ ނަތީޖާ ރަނގަޅު ދެ ޓީމަށް ވެސް މުބާރާތުގެ ކުއާޓާ ފައިނަލުން ފުރުސަތު ލިބިގެންދާނެއެވެ.