ތާލިބާންގެ މަންދޫބާ ބައްދަލުކުރީ ހުއްދަނެތި, ފިޔަވަޅު އަޅައިފިން

ރާއްޖެއިން ޕާކިސްތާނަށް ކަނޑައަޅުއްވާފައި ހުންނަވާ ސަފީރު ތޯހާ މުހައްމަދު، އަފްގާނިސްތާނުގައި ވެރިކަން ކުރަމުން އަންނަ ތާލިބާން ޖަމާއަތުން ޕާކިސްތާނަށް ކަނޑައަޅާފައި މަންދޫބު، ސަރްދާރް އަހުމަދު ޝަކީބާއި ބައްދަލުކުރީ ދިވެހި ސަރުކާރުގެ ހުއްދަ ހޯދުމެއް ނެތި ކަމަށް ހާރިޖީ ވުޒާރާއިން ބުނެފި އެވެ.

ފޮރިން މިނިސްޓްރީން މިއަދު ނެރުނު ބަޔާނެއްގައި ބުނެފައި ވަނީ އެ ބައްދަލުވުމަކީ ދިވެހި ސަރުކާރުގެ ހުއްދައާއެކު ކުރިއަށް ގެންގޮސްފައިވާ ބައްދަލުވުމެއް ނޫން ކަމަށެވެ. އަދި މިކަމާއި ގުޅިގެން އަޅަން ޖެހޭ ފިޔަވަޅުތައް ސަރުކާރުން އަަޅާފައިވާ ކަމަށް އެ ބަޔާނުގައި ބުނެފައިވެއެވެ.

ފޮރިން މިނިސްޓްރީން ބުނެފައިވަނީ, ދިވެހިރާއްޖޭން ޤައުމުތަކުގެ ސަރުކާރުތައް ބަލައިގަތުމުގައި ސުވާލެއް އުފެދޭ ހާލަތެއްގައި އަބަދުވެސް ބަލަނީ އދ.އިން ކަނޑައަޅާފައިވާ މިންގަޑުތަކާއި އުޞޫލުތަކަށް ކަމަށެވެ. އދ.ގައި އަފްޣާނިސްތާނު ތަމްސީލުކުރާ ފަރާތަކީ އަފްޣާނިސްތާނުގެ ސަރުކާރުގެ ގޮތުގައި ދިވެހި ސަރުކާރުން ބަލައިގަންނަ ފަރާތް ކަމަށް ބުނެފައިވެއެވެ.

އަފްގާނިސްތާނުގައި ވެރިކަން ކުރަމުން އަންނަނީ ތާލިބާނުންނެވެ. ތާލިބާނު ސަރުކާރަކީ މިހާތަނަށް އެއްވެސް ގައުމަކުން ބަލައިގަނެފައިވާ ސަރުކާރެއް ނޫނެވެ.