އިންސާނީ ޙައްޤުތަކާ ބެހޭ ކައުންސިލްގައި ރާއްޖެއިން ފަލަސްތީނުގެ ދިފާޢުގައި ތަގްރީރެއް ދީފި

އިންސާނީ ޙައްޤުތަކާ ބެހޭ ކައުންސިލްގެ 57 ވަނަ ސެޝަންގެ މިއަދުގެ ބައްދަލުވުމުގައި ކުރިއަށްދިޔައެ އެޖެންޑާ އައިޓަމް 4: އިންސާނީ ޙައްޤުތަކާ ބެހޭ ކައުންސިލްގެ ސަމާލުކަން ބޭނުންވާ ޙާލަތްތަކާ ބެހޭ އާއްމު ބަހުސްގައި ސަފީރު ޑރ. ސަލްމާ ރަޝީދު ވާހަކަފުޅުދައްކަވައިފިއެވެ.

އެ ކަމަނާގެ ވާހަކަފުޅުގައި ޣައްޒާއަށް ކުރިމަތިވެފައިވާ އިންސާނީ ކާރިސާއަކީ މި ކައުންސިލުން ހާއްސަ ސަމާލުކަމެއް ދޭންޖެހޭ ކަމެއް ކަމުގައި ދިވެހިރާއްޖެއިން ޤަބޫލުކުރާކަމަށް ވިދާޅުވިއެވެ. އަދި ޣައްޒާގެ ހާލަތު ބަޔާންކޮށް ފަލަސްތީނަށް އިންސާނީ އެހީތެރިކަންފޯކޮށްދޭ އ.ދ. އެޖެންސީ- އަންރުވާގެ އެންމެ ފަހުގެ ހާލަތުގެ ރިޕޯޓުން ޣައްޒާގެ އެކި ސަރަހައްދުތަކަށް ބޮޑެތި ގެއްލުންތަކެއް ލިބިފައިވާކަން ހާމަކުރައްވައި ޒަރޫރީ ހިދުމަތްތަކަށާއި އުމްރާނީ ވަސީލަތްތަކަށް ބޮޑެތި ގެއްލުންތަކެއް ލިބިފައިވާކަން ކައުންސިލްގެ ސަމާލުކަމަށް ގެންނެވިއެވެ.

އަދި ފަލަސްޠީނަށް ކުރިމަތިވެފައިވާ ބޮޑެތި ގޮންޖެހުންތަކުން އަރައިގަތުމަށް އަވަސް އަދި ހަރުދަނާ ފިޔަވަޅުތަކެއް އެޅުމުގެ މުހިންމުކަން މި ނުރައްކާތެރި ޙާލަތުތަކުން ހާމަވެގެންދާކަމަށް ފާހަގަ ކުރެއްވިއެވެ.

މިގޮތުން ފަލަސްތީނުގެ ހައްގުތައް ހިމާޔަތްކުރުމަށް މަސައްކަތް ކުރާ އަންރުވާގެ މުވައްޒަފުންނަށާއި ވަސީލަތްތަކަށް އިޒްރޭލުން ދެމުންދާ ލާއިންސާނީ ހަމަލާތަކަށް ޖަވަބުދާރީކުރުވުމަށް ބައިނަލްއަގުވާމީ މުޖުތަމައުން މަސައްކަތްކުރަން ޖެހޭކަމަށް އެކަމަނާ ގޮވާލެއްވިއެވެ.

މީގެ އިތުރުން އެ ކަމަނާގެ ވާހަކަފުޅުގައި އިޒްރޭލުން ފަލަސްތީނުގެ ރައްޔިތުންނަށް ކުރަމުންގެންދާ ލާއިންސާނީ ހަމަލާތަކާއި، ކަލެކްޓިވް ޕަނިޝްމަންޓާއި ޖިންސީ ގޯނާކުރުން ހުއްޓާލުމަށް ގޮވާލެއްވިއެވެ. އަދި މި ކަންކަމަކީ ފަލަސްޠީނު ރައްޔިތުން މިނިވަންކަމަށް ކުރާ މަސައްކަތްތައް ހުއްޓުވުމަށްޓަކައި ފަލަސްޠީނުގެ ރައްޔިތުންނަށް އަދަބު ދިނުމުގެ މަޤްޞަދުގައި ހިންގާ ލާއިންސާނީ ޢަމަލުތަކެއްކަމަށް ސަފީރު ޑރ. ސަލްމާ ރަޝީދު ވިދާޅުވިއެވެ.

އެ ކަމަނާގެ ބަޔާން ނިންމާލެއްވީ ފަލަސްޠީނުގެ ރައްޔިތުން އެބައިމީހުންގެ އަމިއްލަ ދައުލަތެއް ޤާއިމުކުރުމަށް ކުރަމުންގެންދާ މިންނެތް މަސައްކަތުގައި އެއްބާރުލުންދިނުންމަތީ ދިވެހި ސަރުކާރުން އަބަދުވެސް ދެމިއޮންނާނޭކަމުގެ ޔަޤީންކަން ދެއްވަމުންނެވެ. މިގޮތުން 1967 ވަނަ އަހަރުގެ ކުރިން ކަނޑައެޅިފައިވާ އިންތަކާ އެއްގޮތްވާ ގޮތުގެމަތިން، އަދި އިރުމަތީ ޤުދުސްއަކީ އެ ޤައުމުގެ ވެރިރަށްކަމުގައި ކަނޑައަޅައި، ފަލަސްޠީނުގެ ސިޔާދަތީ އަދި މިނިވަން ދައުލަތެއް ޤާއިމްކުރުމަށް ދިވެހި ސަރުކާރުން ގޮވާލާ ގޮވާލުން ތަކުރާރު ކުރެއްވިއެވެ.