މިއަހަރުގެ ތިން ވަނަ ކުއާޓަރުގައި އެސްޓީއޯޢަށް 3.6 ބިލިއަން ރުފިޔާގެ އާމްދަނީ އެއް, ޖުމުލަ ފައިދާގެ ގޮތުގައި 592 މިލިއަން!

މިއަހަރުގެ ތިން ވަނަ ކުއާޓަރުގައި އެސްޓީއޯޢަށް 3.6 ބިލިއަން ރުފިޔާގެ އާމްދަނީ އެއް ލިބިފައިވާ ކަމަށް އެކުންފުނިން ބުނެފި އެވެ.

މިކަން ހާމަވީ އެސްޓީއޯގެ 2024 ވަނަ އަހަރުގެ ތިންވަނަ ކުއާޓަރގެ ހިސާބުތަކުންނެވެ. އެގޮތުން މިއަދު އެކުންފުނިން ވަނީ ތިން ވަނަ ކުއާޓަރުގެ ތަފާސް ހިސާބުތައް އެ ކުންފުނީގެ ވެބްސައިޓްގައި ޢާއްމުކޮށްފައެވެ.

ތަފާސްހިސާބުތައް ދައްކާގޮތުގައި މިހިނގާ 2024 ވަނަ އަހަރުގެ ތިންވަނަ ކުއާޓަރ ގައި އެސްޓީއޯއަށް ޖުމްލަ އާމްދަނީގެ ގޮތުގައި ލިބިފައިވާ 3.6 ބިލިއަން ރުފިޔާއެވެ. މިއީ މީގެ ކުރީ ކުއާޓާރއާއި އަޅާ ބަލައިއިރު 3 އިންސައްތައިގެ ކުރިއެރުމެކެވެ. އެސްޓީއޯއިން ބުނީ ޖުމްލަ އާމްދަނީ އިތުރުވުމުގެ މައިގަނޑު ސަބަބަކީ ކުންފުނިން ކުރަމުންގެންދާ ވިޔަފާރި ރަނގަޅު ވެފައިވުން ކަމަށެވެ.

އާމްދަނީ އިތުރުވުމާއިއެކު ޖުމްލަ ފައިދާގެ ގޮތުގައި އެކުންފުންޏަށް ވަނީ 592 މިލިއަން ރުފިޔާ ލިބިފައެވެ. މިއީ މީގެ ކުރީ ކުއާޓާރއާއި އަޅާ ބަލައިއިރު 15 އިންސައްތައިގެ ކުރިއެރުމެކެވެ.

ކުންފުނީގެ ޕްރޮވިޝަންސް އިތުރުވުމާއިއެކު ކުންފުނީގެ ހަރަދު އިތުރުވީ ނަމަވެސް އެސްޓީއޯގެ ޖުމްލަ ފައިދާ އިތުރުވުމާއިއެކު މިކުއާޓަރގެ ހިންގުމުގެ ފައިދާގެ ގޮތުގައި ވަނީ 251 މިލިއަން ރުފިޔާ އެކުންފުންޏަށް ލިބިފައި ވެއެވެ. މިއީ މީގެ ކުރީ ކުއާޓަރއާއި އަޅާ ބަލައި 23 އިންސައްތައިގެ ކުރިއެރުމެކެވެ.

ޓެކްސްއަށް ކެނޑުމުގެ ކުރިން ތިން ވަނަ ކުއާޓަރުގައި އެކުންފުނީގެ ސާފު ފައިދާއަކީ 198 މިލިއަން ރުފިޔާއެވެ. މިއީ މީގެ ކުރީ ކުއާޓަރއާއި އަޅާބަލައި 12 އިންސައްތައިގެ ކުރިއެރުމެކެވެ. އެސްޓީއޯއިން ބުނީ މިކަމުގެ މައިގަނޑު ސަބަބަކީ، މަތީގައި ބަޔާންކުރެވުނު ފަދައިން، ކުންފުނިން ކުރަމުން ގެންދާ ވިޔަފާރިތައް ރަގަޅުކުރެވި ޖުމްލަ ފައިދާ އިތުރުވެފައިވުން ކަމަށެވެ.

ތަފާސްހިސާބުތައް ދައްކާގޮތުގައި ޓެކުހަށް ކެނޑުމަށްފަހު، މި ކުއާޓަރގެ ސާފުފައިދާގެ ގޮތުގައި އެކުންފުންޏަށް 156 މިލިއަން ރުފިޔާ ލިބިފައި ވެއެވެ.

އެސްޓީއޯއިން ވަނީ އެސްޓީއޯގެ ވިޔަފާރީގެ އެންމެހާ ބައިވެރިން އެސްޓީއޯގެ ކަންކަމާމެދު ބަހައްޓަވާ ގާތްކަމާއި ދެއްވާ އެހީތެރިކަމާއި އެއްބާރުލުމަށް ޝުކުރުއަދާކޮށްފައެވެ.