ހއ އިން ވ އަށް ރީނދޫ ސަމާލު, މ އިން އައްޑޫ ސިޓީއަށް ހުދު ސަމާލު!

މުޅި ރާއްޖެއަށް މޫސުން ގޯސްވާނެ ކަމަށް ލަފާކޮށް މޫސުމީ ސަމާލުތައް ނެރެފި އެވެ.

މޫސުމާއި ބެހޭ ގައުމީ އިދާރާއިން ވަނީ ރާއްޖޭގެ ބައެއް ސަރަހައްދުތަކަށް ރީނދޫ ސަމާލު އަދި އެހެނިހެން ސަރަހައްދުތަކަށް ހުދު ސަމާލު ނެރެފައި އެވެ.

އެގޮތުން ރީނދޫ ސަމާލު ނެރެފައިވަނީ ހއ އަތޮޅުން ފެށިގެން ވ އަތޮޅާއި ހަމައަށެވެ. އެގޮތުން އެސަރަހައްދަށް ގަޑިއަކު 25 މޭލާއި 30 މޭލާއި ދެމެދުގެ ބާރު މިނުމުގައި ވައިޖެހި, ވިލާގަނޑުގައި ގަޑިއަކު 50 މޭލަށް ވައިގަދަވާނެ ކަމަށާއި ކަނޑުތައް ވަރަށް ގަދަވާނެ ކަމަށް މޫސުމާއި ބެހޭ އިދާރާއިން ނެރުނު ރީނދޫ ސަމާލުގައި ބުނެފައި އެވެ.

މީގެ އިތުރުން ހުދު ސަމާލު ނެރެފައިވަނީ ވ އަތޮޅުން ފެށިގެން އައްޑޫ ސީޓިއާއި ހަމައަށެވެ. އެގޮތުން އެސަރަހައްދަށް ގަޑިއަކު 19 މޭލާއި 24 މޭލާއި ދެމެދުގެ ބާރު މިނުމުގައި ވައިޖެހި, ވިލާގަނޑުގައި ގަޑިއަކު 40 މޭލަށް ވައިގަދަވާނެ ކަމަށާއި ކަނޑުތައް ވަރަށް ގަދަވާނެ ކަމަށް މޫސުމާއި ބެހޭ އިދާރާއިން ނެރުނު ހުދު ސަމާލުގައި ބުނެފައި އެވެ.

މި ދެސަމާލުވެސް ނެރެފައިވަނީ މިރޭ 01:15 އިން ފެށިގެން ހެނދުނު 07:00 އާއި ހަމައަށެވެ.

ރާއްޖެއިން މިހާރު ކުޔަމުން ދަނީ ހުޅަނގު މޫސުމުގެ ވިއްސާރައެވެ. އެގޮތުން ފާއިތުވި 4 ދުވަހުވެސް ރާއްޖެއަށް ހުޅަނގު މޫސުމުގެ ބާރު ވަނީ ގަދަވެފައި އެވެ.