ހޫނު މޫސުމަށް ތައްޔާރުވުމަށް ފެނަކައިން އިތުރު ޖެންސެޓްތަކެއް ހޯދަނީ

އަންނަ އަހަރުގެ ރަމަޟާން މަހަށާއި ހޫނުގަދަ ދުވަސްވަރަށް ތައްޔާރުވުމުގެ ގޮތުން، އިތުރު ޖެންސެޓްތަކެއް ހޯދުމަށް ފެނަކައިން ހުޅުވާލައިފިއެވެ.

ފެނަކައިން ބުނީ އިތުރު ޖެނެސެޓުތަކެއް ހޯދަން ނިންމާފައިވަނީ، ރަމަޟާން މަސް ދިމާވަނީ އަހަރުގެ އެންމެ ހޫނު ދުވަސްވަރާކަމުން، އެދުވަސްތަކުގެ ކަރަންޓަށް އޮންނަ ޑިމާންޑު ވަރަށް ބޮޑުތަނުން އިތުރުވެގެން ދާތީ، ކަރަންޓު ކެޕޭސިޓީ އިތުރުކުރުމަށް، ދުރާލާ އެކަމަށް ތައްޔާރުވުމުގެ ގޮތުން ކަމަށެވެ.

އެގޮތުން އެ ކުންފުންޏަށް ބޭނުންވާ 39 ޖެންސެޓް ވިއްކުމަށް ޝައުގުވެރިވާ ރާއްޖެ އާއި ރާއްޖެއިން ބޭރުގެ ފަރާތްތަކަށް، މި މަހުގެ 7 އިން 14 އާއި ހަމައަށް ބިޑަށް ކުރިމަތިލުމުގެ ފުރުސަތު ވަނީ ހުޅުވާލެވިފައެވެ.

އެ ކުންފުނިން ހޯދުމަށް އިޢުލާންކޮށްފައިވަނީ، 250 ކިލޯވޮޓުގެ 7 ޖެން ސެޓާއި 400 ކިލޯވޮޓުގެ 6 ޖެން ސެޓްގެ އިތުރުން 600 ކިލޯވޮޓުގެ 8 ޖެން ސެޓާއި 800 ކިލޯވޮޓުގެ 5 ޖެން ސެޓް، އަދި 1000 ކިލޯވޮޓުގެ 6 ޖެން ސެޓާއި 1200 ކިލޯވޮޓުގެ 5 ޖެން ސެޓްގެ އިތުރުން 1600 ކިލޯވޮޓުގެ 2 ޖެން ސެޓެވެ.

މި ޖެންސެޓްތައް ވިއްކުމަށް ޝައުޤުވެރިވާ ފަރާތްތަކަށް އޮކްޓޫބަރު މަހުގެ 14 ގެ ނިޔަލަށް ބިޑުގައި ރަޖިސްޓްރީވެވޭނެއެވެ އަދިއަންދާސީ ހިސާބު ހުށަހަޅޭނީ މި މަހުގެ 15 އާއި 16 ގައި ކަމަށް ފެނަކައިން ބުނެއެވެ.

ފެނަކައިން މިހާރުވެސް ދަނީ ރާއްޖޭގެ ބައެއް ސަރަހައްދުތަކުގެ ކަރަންޓުގެ ހާލަތު ރަނގަޅު ކުރުމަށް ގިނަ މަސައްކަތްތަކެއް ކުރަމުންނެވެ.