މިނިސްޓަރު ތޯރީގް އިނގިރޭސިވިލާތުގެ ތިމާވެއްޓާއި ބެހޭ ވަޒީރާއި ބައްދަލުކުރައްވައިފި

ރާއްޖޭގެ ތިމާވެއްޓާއި ބެހޭ ވަޒީރު ޠާރިޤް އިބްރާހިމް އިނގިރޭސިވިލާތުގެ މޫސުމަށް އަންނަ ބަދަލުތަކާބެހޭ ކަންތައްތަކާ ހަވާލުވެ ހުންނެވި މިނިސްޓަރ ކެރީ މެކާތީއާ ބައްދަލުކުރައްވައިފިއެވެ.

މި ބައްދަލުކުރެއްވުން އޮތީ ދިވެހިރާއްޖެއިން އދ. ގެ މަޖިލީހުގެ 79 ވަނަ ދައުރުގެ ޖަލްސާތަކުގައި ބައިވެރިވުމަށް ޔޫ.އެން.ޖީ.އޭ އަށް ކުރައްވާފައިވާ ދަތުރުފުޅުގެ ހަވާސާގައި އެވެ.

މި ބައްދަލުވުމުގައި ދެ ޤައުމުގެ މެދުގައި މޫސުމަށް އަންނަ ބަދަލުތަކާއި، ހަކަތައިގެ ދާއިރާއާއި، ދިރޭތަކެތީގެ ނަސްލު ހިމާޔަތްކުރުމާ ގުޅޭ ގޮތުން މަޝްވަރާކުރެވުނެވެ. އަދި މި ދާއިރާތަކުން އިސްކަންދޭ ކަންތައްތަކާ ބެހޭ ގޮތުން ވަނީ މަޝްވަރާކޮށްފައެވެ.. މީގެ އިތުރުން، އިނގިރޭސިވިލާތުން ދިވެހިރާއްޖޭގައި ތަންފީޒުކުރަމުންދާ މަޝްރޫޢުތަކާ ބެހޭ ގޮތުންވެސް މަޝްވަރާކޮށްފައި ވެއެވެ.

މި ބައްދަލުވުމަކީ ދެ ޤައުމުގެ މެދުގައި އޮތް ގުޅުން އިތުރަށް ބަދަހިކޮށް، މޫސުމަށް އަންނަ ބަދަލުތަކާ ގުޅޭ ގޮތުން އެއްބާރުލުން އިތުރުކުރުމަށް މަގުފަހިވެގެންދާނެ ބައްދަލުވުމެއް ކަމުގައި ބެލެވޭ ކަމަށް ތިމާވެއްޓާއި ބެހޭ ވުޒާރާއިން ބުނެއެވެ. އަދި ދެ ޤައުމުގެ މެދުގައި މި ދާއިރާއިން ކުރިއަށް އޮތްތަނުގައި އިތުރު މަސައްކަތްތަކެއް ކުރެވިގެންދާނެ ކަމަށް އުންމީދުކުރެވޭ ކަމަށެވެ.