ނެޝަނަލް ހިއުމަން ކެޕިޓަލް ސާރވޭ ގެ ވެލިޑޭޝަން މީޓިންގ ބާއްވައިފި

ދިވެހިރާއްޖޭގެ ވަޒީފާގެ ބާޒާރަށް ބޭނުންވާ ފަންނުވެރިކަމާއި ހުނަރުތައް ދެނެގަތުމުގެ ގޮތުން، މިނިސްޓްރީ އޮފް ހަޔަރ އެޑިޔުކޭޝަން ލޭބަރ އެންޑް ސްކިލްސް ޑިވްލޮޕްމަންޓް އާއި ވާރލްޑް ބޭންކު ގުޅިގެން ކުރިއަށް ގެންދާ މަޝްރޫޢު "ސަސްޓެއިނަބަލް އެންޑް އިންޓަގްރޭޓެޑް ލޭބަރ ސަރވިސަސް" (ސެއިލްސް) ގެ ދަށުން ހިންގުނު ނޭޝަނަލް ހިއުމަން ކެޕިޓަލް ނީޑްސް އެސެސްމަންޓް ސާރވޭގެ މަސައްކަތް ނިމުމާގުޅިގެން ދިރާސާގެ ރިޕޯޓް ތައްޔާރުކޮށް ނިންމުމުގެ މަސައްކަތުގެ ތެރެއިން ހިންގުނު ވެލިޑޭޝަން މީޓިންގް 18 ސެޕްޓެމްބަރު 2024 ގައި ބާއްވައިފި އެވެ.

މިނިސްޓްރީން ބުނީ މިވެލިޑޭޝަން ބައްދަލުވުގެ ބޭނުމަކީ މުހިންމު މަޞްލަޙަތުވެރިންނަށް ދިރާސާގެ ހޯދުންތައް ހުށަހަޅާ މި ދިރާސާއާ ގުޅުންހުރި މައިގަނޑު ދާއިރާތަކުގެ ޙާލަތު ދިރާސާގެ ހޯދުންތަކުގައި ހިމެނިފައިވާ މިންވަރު ވަޒަންކުރުމަށާއި އެފަރާތްތަކުގެ ޚިޔާލާއި މަޝަވަރާއާއެކު ދިރާސާގެ ހުށަހެޅުންތައް ފުރިހަމަ ކުރުމުވެ.

ނޭޝަނަލް ހިއުމަން ކެޕިޓަލް އެސެސްމަންޓްގެ މައިގަނޑު މަޤްޞަދަކީ އިޤްތިޞާދީ ދާއިރާތަކަށް ބޭނުންވާ މަސައްކަތުގެ ހުނަރުތައް ދެނެގަތުމެވެ. މިގޮތުން މިހާރު ހުރި މަޢުލޫމާތުގެ އިތުރުން، ސަރވޭގައި ދިވެހިރާއްޖޭގެ 11 އަތޮޅަކާއި މާލެ ސިޓީއިން، 15 އަހަރާއި 59 އަހަރާ ދެމެދުގެ 1،573 މީހުންގެ މައްޗަށް އެކުލެވޭ ސާމްޕަލްއަކުން މަޢުލޫމާތު އެއްކުރެވުނެވެ. މި ސަރވޭގައި ވަޒީފާގެ ބާޒާރުގެ މައިގަނޑު 6 ދާއިރާއެއްގެ މަޢުލޫމާތު ހިމެނިފައިވެއެވެ. މިސާރވޭގެ ނަތީޖާއިން ދިވެހިރއްޖޭގައި އުފެދޭނެ ވަޒީފާ ތަކާއި، އެވަޒީފާތަކަށް އޮތް ވާދަވެރިކަމާއި، އިޤްތިޞާދީ ދާއިރާތަކުން ލިބެންހުރި ތަމްރީނުތައް ދެނެގަތުމާއި، މިތަމްރީނުތަކާއި ޞިނާޢަތުގެ ބޭނުންތަކާއި ގުޅިފައިވާ މިންވަރު ދެނެގަނެވޭނެއެވެ.

މި ބައްދަލުވުން ފަށްޓަވައިދެއްވަމުން ސްޓޭޓް މިނިސްޓަރ ޑރ. ފައިރޫޝް ގެ ވާހަކަފުޅުގައި، މިދިރާސާގެ މަޤްޞދަކީ ހުނަރުގެ ދަތިކަން ހުރި މިންވަރު ބެލުމާއި، ޚާއްޞަކޮށް ތަމްރީނުގެ ބޭނުންތައް ދެނެގަތުމާއި، ހޯދުންތަކުގެ މައްޗަށް ބިނާކޮށް ޤައުމީ ފެންވަރުގައި އިސްކަންދޭންވީ ތަމްރީނުތަކުގެ ރޯޑްމެޕެއް އެކުލަވާލެއްވުން ކަމުގައި ފާހަގަ ކުރެއްވިއެވެ.

މި ސާރވޭގައި އެއްކުރެވޭ ހޯދުންތަކުގެ އަލީގައި، ތަމްރީނުދޭ އިދާރާތަކާއި އިންސްޓިޓިއުޓްތަކުން ހިންގާ ތަމްރީނު ޕްރޮގްރާމްތަކާއި، ވަޒީފާދޭ ފަރާތްތަކުން ބޭނުންވާ ހުނަރުތަކާ ދެމެދު ހުރި ފަރަގު ދެނެގަނެ، ރާއްޖޭއަށް ބޭނުންވާ ޢިލްމާއި މަސައްކަތުގެ ހުނަރު ދަސްކޮށްނިދުމުގެ މަގުޗާޓެއް އެކުލަވާލެވޭނެއެވެ. މީގެ އިތުރުން ރާއްޖޭގައި ހިމެނޭ މަސައްކަތުގެ ދާއިރާތަކުގެ މަޢުލޫމާތު އެއްކުރެވިފައިވާ ލޭބަރ މާކެޓް އިންފޮމޭޝަން ސިސްޓަމެއް (އެލް.އެމް.އައި.އެސް) ޤާއިމުކުރުމާއި ނެޝަނަލް ކެރިއާސް ސާރވިސް މެދުވެރިކޮށް ވަޒީފާ ހޯދަމުންދާ ފަރާތްތަކަށް ވަޒީފާގެ ފުރުޞަތު ފަހިކޮށްދިނުމަށް ކުރަމުންދާ މަސައްކަތްތައް ހަރުދަނާކުރުމުގައި މިސާރވޭގެ ހޯދުންތަކުން އެހީތެރިވޭދޭނެއެވެ.