21 ވަނަ ޤަރުނަށް ބޭނުންވާ ހުނަރުތަށް ޒުވާނުންނަށް ދަސްކޮށްދޭންޖެހޭ - މާރިޔާ

21 ވަނަ ޤަރުނަށް ބޭނުންވާ ހުނަރުތަށް ދިވެހި ޒުވާނުންނަށް ދަސްކޮއްދެން ޖެހޭކަމަށް މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް، ޑރ. މަރްޔަމް މާރިޔާ ވިދާޅުވެއްޖެއެވެ.

އެކަމަނާ މިހެން ވިދާޅުވެފައިވަނީ މޯލްޑިވިސް: އެންހޭންސިންގ އެމްޕްލޮޔަބިލިޓީ އެންޑް ރެޒިލިއަންސް އޮފް ޔޫތް ޕްރޮޖެކްޓް (މީރީ) އަށް 5 އަހަރު ފުރުމުގެ މުނާސާބާގައި ބޭއްވި ހަފްލާއެއްގައެވެ.

އެކަމަނާ ވިދާޅުވީ މީރީ ޕްރޮޖެކްޓަކީ ޒުވާނުންގެ ހުނަރުވެރިކަން ޢިއާދަކޮށް، ތަރައްޤީކުރުމަށް އެތަށް މަސައްކަތެއް ކުރަމުން އަންނަ ޓީމެއް ކަމަށާއި، މީރީ ޕްރޮޖެކްޓުން އުފައްދާ ޑިޖިޓަލް ވަސީލަތްތަކާއި އެ ޕްރޮޖެކްޓްގެ ދަށުން ހިންގާ އެކި ހަރަކާތްތަކަކީ ޒުވާނުން ޝައުގުވެރިވާފަދަ ހަރަކާތްތަކެއްކަން އެކަމަނާ ވަނީ ފާހަގަކުރައްވާފައެވެ.

"މިނިސްޓްރީގެ ފަރާތުން ޒުވާނުންގެ ހުނަރުވެރިކަން އިތުރުކުރުމަށް އެތަށް މަސައްކަތެއް ކުރަމުންދާއިރު، މީރީ ޕްރޮޖެކްޓާއި މިނިސްޓްރީގައި މަސައްކަތްކުރައްވާ ހުރިހާ ބޭފުޅުންގެ ފަރާތުން ދެއްވާ އެއްބާރުލުމަށް ޝުކުރު ދަންނަވަން. ޒުވާނުން ހުނަރުވެރިކުރުމުގެ މި މަސައްކަތުގައި، ދިވެހި ޒުވާނުންނަށް 21 ވަނަ ޤަރުނަށް ބޭނުންވާ ހުނަރުތަށް ދަސްކޮއްދޭން ޖެހޭ"

މީރީ ޕްރޮޖެކްޓަށް 5 އަހަރު ފުރުމުގެ މި ރަސްމިއްޔާތުގައި، މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް، ޑރ. މަރްޔަމް މާރިޔާ، މީރީ ޕްރޮޖެކްޓްގެ މެނޭޖަރ، ޢަލީ ޝަރީޕް، މީރީ ޕްރޮޖެކްޓާއި މިނިސްޓްރީގައި މަސައްކަތްކުރައްވާ އެކި މުވައްޒަފުން މި ރަސްމިއްޔާތުގައި ވަނީ ބައިވެރިވެވަޑައިގަންނަވާފައެވެ.