އިޖުތިމާއީ ކަންކަމާއި ބެހޭ ވުޒާރާ އާއި އެހީ ޖަމިއްޔާއާދެމެދު ފަހުމުނާމާއެއް!

އިޖުތިމާޢީ އަދި ޢާއިލީ ތަރައްޤީއާބެހޭ ވުޒާރާގެ މޭންޑޭޓުގެ ތެރެއިން ކުރެވޭ މަސައްކަތްތަކުގައި އެހީ ޖަމިއްޔާގެ ފަރާތުން މިވުޒާރާއަށް ބޭނުންވާ އެހީތެރިކަން ފޯރުކޮށްދިނުމާއި، އެވުޒާރާގެ މަސައްކަތްތަކާ ފޯރުކޮށްދެމުންދާ ޚިދުމަތްތަކާއި ގުޅޭގޮތުން އެހީ ޖަމިއްޔާގެ މެމްބަރުން އަހުލުވެރިކުރުމަށްޓަކައި ތަމްރީނު ޕްރޮގްރާމްތައް ހިންގުމުގެ މަޤްޞަދުގައި ފަހުމުނާމާއެއްގައި ސޮއިކޮށްފިއެވެ.

މިފަހުމުނާމާގެ ދަށުން އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއަށް ހުށަހެޅޭ މައްސަލަތަކުގައި އެހީތެރިކަން ބޭނުންވާ ޢާއިލާތަކަށް ނަފްސާނީ އަދި އިޖުތިމާޢީ އެހީތެރިކަން ފޯރުކޮށްދޭއިރު އެ މަސައްކަތުގައި އެހީ ޖަމިއްޔާއިން ވުޒާރާއަށް އެހީތެރިކަން ފޯރުކޮށްދިނުމަށް ވަނީ އެއްބަސްވެފައެވެ.

އެއާއެކު، ވުޒާރާއަށް ހުށަހެޅޭ މައްސަލަތަކުގެ ތެރެއިން ދިރިއުޅުމުގެ ޙާލަތު ދަށް ފަރާތްތަކަށް ބޭނުންވާ އެހީތެރިކަން ފޯރުކޮށްދިނުމާއި، މިވުޒާރާއަށް ހުށަހެޅޭ މައްސަލަތަކުގައި ހިމެނޭ ފަރާތްތައް އިގުތިސާދީ ގޮތުން ބާރުވެރި ކުރުވުމަށްޓަކައި އަމިއްލަ މަސައްކަތެއް ފެށުމަށް ބޭނުންވާ މާލީ އެހީތެރިކަން ނުވަތަ ވަސީލަތްތައް ފޯރުކޮށްދިނުމުގައި އެހީތެރިވުމަށްވެސް ވަނީ އެއްބަސްވެފައެވެ.

މީގެ އިތުރުން، ވުޒާރާއަށް ހުށަހެޅިފައިވާ މައްސަލަތަކުގެ ތެރެއިން ދިރިއުޅުމުގެ ޙާލަތު ދަށްވުމުގެ ސަބަބުން ކޯޓަށް ދައްކަން ޖެހޭ ފައިސާ ނުދެއްކި ހުރުމާއި، އެކަންކަމާއި ގުޅިގެން އަންނަ ޖުރުމަނާ ފައިސާ ދެއްކުމުގައި އެހީ ޖަމުޢިއްޔާއިން އެހީތެރިކަން ފޯރުކޮށްދިނުމަށް ވަނީ އެއްބަސްވެފައިވެއެވެ.

އިޖުތިމާޢީ އަދި ޢާއިލީ ދުޅަހެޔޮކަން ކަށަވަރުކޮށް، އިޖުތިމާޢީ ފޭރާން ހެޔޮކުރުމަށްޓަކައި އެހީ ޖަމިއްޔާ ފަދަ އެންޖީއޯތަކާއި އަމިއްލަ ފަރުދުންގެ ފަރާތުން ލިބެމުންދާ އެހީތެރިކަން ފާހަގަކޮށް، އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ވަނީ ޝުކުރުއަދާކޮށްފައެވެ.