--
ރައީސް ޑރ މުހައްމަދު މުއިއްޒުގެ ސަރުކާރުގެ "ހަފުތާ 14" ގައި ވާގޮތަށް، މަސްވެރިންގެ ޤައުމީ ދަފްތަރެއް އެކުލަވާލުމަށް ކުރަމުންދާ މަސައްކަތުގެ ތެރެއިން ގއ އަތޮޅުގެ ގިނަ އަދަދެއްގެ މަސްދޯނިތަކުގެ މަސްވެރިން ދަފްތަރު ކުރެވިފައިވާ ކަމަށް ފިޝަރީޒް މިނިސްޓްރީއިން ބުނެއެވެ.
އެމިނިސްޓްރީއިން މިއަދު ބުނީ މަސްވެރިންގެ ދަފްތަރުގައި މަސްވެރިން ރަޖިސްޓްރީކުރުމުގެ މަސައްކަތް ގއ އަތޮޅުގެ ކައުންސިލްތަކާއި މަސްވެރިންނާއި ގުޅިގެން ބާރު ސްޕީޑެއްގައި ކުރަމުންދާ ކަމަށެވެ. އެގޮތުން މިހާތަނަށް ގއ އަތޮޅުގެ 41 އިންސައްތަ މަސްދޯނިތަކުގެ މަސްވެރިން ރަޖިސްޓްރީ ކުރެވިފައިވާ ކަމަށް އެމިނިސްތްރީއިން ވަނީ ހާމަކޮށްފައެވެ.
ސަރުކާރުން އެކުލަވައިލަން ނިންމި މަސްވެރިންގެ ދަފުތަރުގެ މަސައްކަތް ނިންމުމަށް ސަރުކާރުން ފުރަތަަ އަމާޒު ހިފީ މި އަހަރުގެ ޖުލައި މަހަށެވެ. މި މަސައްކަތަށް މިނިސްޓްރީގެ ޓީމުތައް އަދިވެސް ދަނީ ގއ، ގދ. އައްޑޫ ސިޓީ، ފުވައްމުލައް، ލ، ށ، އދ އަދި ހދ. އަތޮޅުގައި ހަރަކާތްތެރިވަމުންނެވެ. އަދި އެ އަތޮޅުތަކުގެ މަސްވެރިންގެ ދަފްތަރު ކުރެވުމުން ޓީމުތައް ދެން ހަރަކާތްތެރި ވާނީ ހއ، ޅ، ތ، އަދި މާލެ ސަރަހައްދުގައި އެވެ.
ދަފުތަރެއް އެކުލަވާލުމުގެ މައިގަނޑު އެއްބޭނުމެއްގެ ގޮތުގައި މި ކަރުދާހުގައި ފާހަގަކުރައްވާފައިވަނީ މަސްވެރިކަމަކީ ޕްރޮފެޝަނަލް މަސައްކަތެއްގެ ގޮތުގައި ކަނޑައެޅި މަސްވެރިންނަކީވެސް އެހެނިހެން މަސައްކަތްތަކެކޭ އެއްފަދައިން ދަޢުލަތް ދަންނަ ޢާމްދަނީ ލިބޭ މަސައްކަތެއްކުރާ ބައެއްގެ ގޮތުގައި ކަނޑައެޅުމެވެ. ހަމަ އެހެންމެ، މިފަދަ ދަފްތަރެއް އޮތުމަކީ މަސްވެރިން ބޭންކިންގ ނިޒާމުގެ ތެރެއަށް ވެއްދުމަށާއި، ތަފާތު އެކިއެކި ބޭނުންތަކަށް މަސްވެރިންނަށް އަމާޒުކޮށް ލޯނު ދޫކުރުމަށާއި މަސްވެރިންނަށް ދަޢުލަތުން ފޯރުކޮށްދިނުމަށް ބޭނުންވާ އިޖްތިމާޢީ ރައްކާތެރިކަމާއި ސަބްސިޑީފަދަ ވަސީލަތްތައް ސީދާ މަސްވެރިންނަށް ފޯރުކޮށްދެވޭނެ އިންތިޒާމެއް ހަމަޖެއްސުމަށް ކޮންމެހެން މުހިންމު ކަމެއްކަމުގައި މިނިސްޓްރީއިން ދެކެއެވެ.
ފަހުގެ
