މާލެއިން ފުރައިގެން ނައިފަރަށް ދަތުރުކުރި ލޯންޗެއް އިންޖީނު ހުއްޓި ހާލުގައި ޖެހުމުން ސިފައިން އެހީތެރިކަން ފޯރުކޮށްދީފި

މާލެއިން ފުރައިގެން ނައިފަރަށް ދަތުރުކުރި ލޯންޗެއް އިންޖީނު ހުއްޓި ހާލުގައި ޖެހުމުން ސިފައިން އެހީތެރިކަން ފޯރުކޮށްދީފި އެވެ.

ސިފައިން މިއަދު ބުނީ މާލޭއިން ފުރައިގެން ޅ.ނައިފަރަށް ދަތުރުކުރި ލޯންޗެއް ކ.ހިންމަފުށީގެ ހުޅަނގުއުތުރުން 9 ނޯޓިކަލްމޭލު ބޭރުން އިންޖީނު ހުއްޓިގެން، ސިފައިން އެހީތެރިކަން ފޯރުކޮށްދީފައިވާ ކަމަށެވެ.

އެގޮތުން އެ ލޯންޗުގައި ތިބި 16 މީހަކު، އެމްއެންޑީއެފް މާލޭ އޭރިއާ ކޮމާންޑް ކޯސްޓްގާޑް ސެކަންޑް ސްކޮޑްރަންގެ އެހީތެރިކަމާއެކު މިއަދު 13:40 ހާއިރު މާލެ ގެނެސްދީފައިވާ ކަމަށް ސިފައިން ވަނީ ބުނެފައި އެވެ.

މައުލޫމާތު ލިބިފައިވާ ގޮތުގައި އިންޖީނު ހުއްޓުވީ މާލެއާއި ޅ އަތޮޅާއި ދެމެދު ދަތުރުކުރާ ފެރީ ލޯންޗެކެވެ.

މިފަދަ ހާދިސާއެއް ހިނގި އިރު މޫސުން ގޯސްވާނެކަމަށް މެޓް އޮފީހުން ލަފާކޮށްފައިވާތީ ކަނޑުދަތުރުފަތުރު ކުރާ ފަރާތްތަކުން މޫސުމަށް ސަމާލުވުމަށް ސިފައިން ވަނީ އިލްތިމާސްކޮށްފައެވެ.