އިސްތިގާލީ ސަރުކާރާއި ހަވާލުވެވަޑައިގަތުމަށް ޔޫނުސް ބަންގްލަދޭޝަށް ވަޑައިގެންފި

އިސްތިގާލީ ސަރުކާރާއި ހަވާލުވެވަޑައިގަތުމަށް ޑރ މުހައްމަދު ޔޫނުސް ބަންގްލަދޭޝަށް ވަޑައިގެންފި އެވެ.

ނޯބެލް ސުލްހައިގެ އިނާމު ހާސިލްކުރެއްވި ޑރ ޔޫނުސް ފްރާންސްގެ ވެރިރަށް ޕެރިހުން އެނބުރި ބަންގްލަދޭޝްގެ ވެރިރަށް ޑާކާގެ ހަޒްރަތު ޝާހްޖަލާލް އިންޓަނޭޝަނަލް އެއާޕޯޓަށް ވަޑައިގެންނެވީ މެންދުރު ފަހު 2:10 ހާއިރު އެވެ.

ޔޫނުސް އެނބުރި ގައުމަށް ވަޑައިގެންނެވި ވަގުތަށް ރިއާޔަތްކޮށް، އިންތިގާލީ ސަރުކާރު ހުވާކުރުމުގެ ރަސްމިއްޔާތަށް މިރޭ 8:00 ހާއިރު ބަންގަބާނުގައި ބޭއްވުމަށް ވާންޖެހޭ ތައްޔާރީތައް ވަނީ ވެފަ އެވެ.

އެއާޕޯޓުން ޔޫނުސްއަށް މަރުހަބާ ދެންނެވީ ތްރީ ފޯސަސްގެ ޗީފް، އެންޓި ޑިސްކްރިމިނޭޝަން ސްޓޫޑެންޓް މޫވްމަންޓް ކޯޑިނޭޓަރު ނާހިދު އިސްލާމް، އާސިފް މަހްމޫދު، ސާޖިސް އަލަމް، ހަސްނަތު އަބްދުالله އަދި އެހެނިހެން ކޯޑިނޭޓަރުންނެވެ. މީގެ އިތުރުން ޑާކާ ޔުނިވާސިޓީގެ ލޯ ޕްރޮފެސަރު އާސިފް ނަޒްރުލް އާއި އިލެކްޝަން އޮބްޒާވަރު އަދި ބްރަތީގެ ޗީފް އެގްޒެކެޓިވް އޮފިސަރު ޝަރުމިން މުރުޝިދާއި މަދަނީ ޖަމިއްޔާތަކުގެ މަންދޫބުން ވެސް ވަނީ މަރުހަބާ ކިޔާފަ އެވެ.

ބަންގްލަދޭޝްގައި އިންތިގާލީ ސަރުކާރެއް ގާއިމްކުރުމަށް މަޖުބޫރުވީ އެގައުމުގެ ބޮޑުވަޒީރުކަން މެދުކެނޑުމެއްނެތި 16 އަހަރު ކުރެއްވި ޝެއިހް ހަސީނާ އިއްޔެ އިސްތިއުފާ ދެއްވުމާއި ގުޅިގެންނެވެ. ހަސީނާ އިސްތިއުފާ ދެއްވަން މަޖުބޫރުވީ އެގައުމުގެ ދަރިވަރުން ހުއްޓުމެއްނެތި ކުރިޔަށް ގެންދިޔަ ވަރުގަދަ މުޒަހާރަތަކާއި އެކުގައި އެވެ.

މިއާއި އެކު އިންތިގާލި ސަރުކާރެއް އެކުލަވާލުމުގައި އެންމެ ބޮޑަށް އެގައުމުގެ ރައީސް ބެއްލެވީ ދަރިވަރުންގެ މުޒާހަރާތަކުގައި އިސްކޮށް ހަރަކާތްތެރިވި ދަރިވަރުންގެ ހިޔާލާއި މަޝްވަރާއަށެވެ.

އުމުރުން 84 އަހަރުގެ ޔޫނުސް ނުވަތަ މަޝްހޫރު ނަމުން ނަމަ "ފަގީރުންނަށް ބެންކަރ" އަކީ މައިކްރޯލެންޑިންގައި އިސްކޮށް އުޅުއްވުމަށް ފަހު، ކުދި ކުދި ލޯނުތައް ދީގެން އެތައް މިލިއަން ބަޔަކު ފަގީރުކަމުން އަރައިގަތުމަށް އެހީތެރިވުމުގެ ސަބަބުން 2006 ވަނަ އަހަރު ނޯބެލް ސުލްހައިގެ އިނާމު ލިބިވަޑައިގެންނެވި ބޭފުޅެކެވެލ. ބަންގްލަދޭޝްގައި ކޮރަޕްޝަންގެ ތުހުމަތުތަކާ ކުރިމަތިވެ، ހަސީނާގެ ވެރިކަމުގައި ޝަރީއަތް ކުރިއަށް ގެންދިޔަ ނަމަވެސް، އޭނާގެ މައްޗަށް އުފުލާފައިވާ ދައުވާތަކަކީ ސިޔާސީ މަގްސަދެއްގައި އުފުލާފައިވާ ދައުވާތަކެއް ކަމަށް އޭނާ ވިދާޅުވި އެވެ.

ރޮއިޓާސް ނިއުސް އެޖެންސީން ރިޕޯޓްކޮށްފައިވާ ގޮތުގައި ޔޫނުސްގެ ތަރުޖަމާނަކު ވިދާޅުވީ އިންތިގާލީ ސަރުކާރުގެ އެޑްވައިޒަރަކަށް ވުމަށް ދަރިވަރުން އެދުނު އެދުމަށް އޭނާ އިޖާބަދެއްވައި އެކަން ގަބޫލުފުޅު ކުރައްވާފައިވާ ކަމަށެވެ.