--
ލަންކާގެ ރިޔާސީ ރޭހަށް ކުރީގެ ރައީސް މަހިންދަ ރާޖަޕަކްސަގެ ދަރިކަލުން ނަމާލް ރާޖަޕަކްސަ ނުކުންނަވައިފި އެވެ.
ކުރިއަށް އޮތް ލަންކާގެ ރިޔާސީ އިންތިހާބުގައި ސްރީލަންކާ ޕޮޑުޖަނާ ޕެރަމުނާ (އެސްއެލްޕީޕީ) ގެ ނެޝަނަލް އޯގަނައިޒަރު މެމްބަރު ނަމާލް ރާޖަޕަކްސަ އެ ޕާޓީގެ ރަސްމީ ކެނޑިޑޭޓަކަށް ހަމަޖައްސައި އެކަން ރަސްމީކޮށް އިއުލާނުކުރީ އިއްޔެ އެވެ.
ރާޖަޕަކްސަ އާއިލާއިން ގިނަ އަހަރުތަކެއް ވެރިކަން ކުރެއްވި ލަންކާގެ ރިޔާސީ އިންތިހާބުގައި ނަމާލް ވާދަކުރާނެކަން އިއުލާނުކުރުމާއި އެކު އޭނާ ވެގެންގޮސްފައިވަނީ އެގައުމުގެ ރިޔާސީ އިންތިހާބެއްގައި ވާދަކުރާނެ އެންމެ ޒުވާން ކެނޑިޑޭޓަށެވެ.
އެގައުމުގެ ކުރީގެ ރައީސް އަދި ބޮޑުވަޒީރު މަހިންދަ ރާޖަޕަކްސަގެ ދޮށީ ދަރިކަލުން, ނަމާލް ވަނީ ލޯ ޑިގްރީ ސިޓީ ޔުނިވާސިޓީ ލަންޑަން އިން ދަސްވެނިވެވަޑައިގެންފަ އެވެ. އޭގެ ފަހުން ލަންކާ ލޯ ކޮލެޖާ ގުޅިވަޑައިގަތީ ގާނޫނީ ވަކީލެއްގެ މަގާމަށް ކޮލިފައިވުމަށެވެ.
ނަމާލްގެ ނަން އެސްއެލްޕީޕީގެ ކެނޑިޑޭޓެއްގެ ގޮތުގައި އިއުލާނުކުރި އިރު އެސްއެލްޕީޕީގެ ކެނޑިޑޭޓް ކަމަށް ކުރިން ބެލެވުނު އެސްއެލްޕީޕީގެ މެމްބަރު އަދި ވިޔަފާރިވެރިޔާ ދަމްމިކާ ޕެރޭރާ ވަނީ އަމިއްލަ ސަަބަބުތަކަށްޓަކައި ކެންޑިޑެސީއިން ވަކިވާން ނިންމެވިކަން އެ ޕާޓީއަށް އަންގަވާފައެވެ.
ނަމާލްއާއި އެކު ލަންކާގެ އިންތިހާބުގައި މިހާރުގެ ބޮޑުވަޒީރު ރަނިލް ވިކްރަމަސިންހަ އާއި ސަމާގީ ޖަނާ ބަލަވެގަޔާ (އެސްޖޭބީ) ގެ ސަޖިތު ޕްރޭމަދާސާ އާއި ޖަނަތާ ވިމުކްތީ ޕެރަމުނާ (ޖޭވީޕީ) ގެ ލީޑަރު އަނޫރާ ކުމާރާ ޑިސާނަޔަކައާ ވާދަކުރައްވާނެ އެވެ.
ނަމާލް ވަނީ މީގެ ކުރިން އެގައުމުގެ ބައެއް ވުޒާރާތަކުގެ ވަޒީރުކަންވެސް ކުރައްވާފައި އެވެ. އަދި ނަމާލް ފާހަގަކުރެވިގެންދަނީ ރާއްޖޭގެ ސިޔާސީ ލީޑަރުންނާއިވެސް ގާތް ގުޅުމެއް އޮންނަ ބޭފުޅެއްގެ ގޮތުގައި އެވެ.
ފަހުގެ
