ލަންކާގެ އައު ރައީސަށް ގާނޫނު ހަދާ މަޖިލީހުގެވެސް ފުރިހަމަ ބާރު ލިބިއްޖެ!

ސްރީލަންކާގެ ރައީސް އަނޫރާ ކުމާރާ ޑިސަނަޔަކަގެ ވާތުފިޔައިގެ ކޯލިޝަނުން އެގައުމުގެ ގާނޫނު ހަދާ މަޖިލީހުގެ ފުރިހަމަ ބާރު ހޯދައިފި އެވެ.

ވެރިކަމާ ހަވާލުވެ ވަޑައިގަތުމަށް ފަހު، ގާނޫނު ހަދާ މަޖިލިސް އުވާލެއްވުމާއި ގުޅިގެން އިއްޔެ އެގައުމުގައި ބޭއްވެވި އަވަސް އިންތިހާބުގައި ޑިސަނަޔަކަގެ ނޭޝަނަލް ޕީޕަލްސް ޕަވާ (އެންޕީޕީ) ކޯލިޝަނަށް ވަނީ މަޖިލީހުގެ ތިންބައިކުޅަ ދެބައިގެ އަޣުލަބިއްޔަތު ލިބިފައި އެވެ. އެ ގައުމުގެ އިލެކްޝަންސް ކޮމިޝަނުން ބުނާގޮތުގައި އެންޕީޕީ ކޯލިޝަނަށް 225 ގޮނޑީގެ ތެރެއިން 159 ގޮނޑި ވަނީ މިހާރު ކާމިޔާބުކުރެވިފައި އެވެ.

އުމުރުން 55 އަހަރުގެ ތަޖުރިބާކާރު ސިޔާސީ ބޭފުޅެއް ކަމަށްވާ ދިސަނަޔަކަ ސެޕްޓެމްބަރު މަހުގެ 21 ވަނަ ދުވަހު ރައީސް ކަމަށް އިންތިހާބުވެވަޑައިގަތީ 1948 ވަނަ އަހަރު އިނގިރޭސީންގެ އަތްދަށުން މިނިވަންވި ފަހުން އެ ގައުމުގައި ވެރިކަން ކުރަމުން އައި ބޮޑެތި ސިޔާސީ ވާދަވެރިން ބަލިކުރެއްވުމަށްފަހުގައި އެވެ.

މަޖިލީހުގެ އަވަސް އިންތިހާބުގެ ނަތީޖާތައް މިހާރު އިއުލާނުކުރަމުންދާއިރު ދިސަނަޔަކަގެ ޕާޓީއަށް ލިބުނު ކާމިޔާބީން، ކޮރަޕްޝަނާ ދެކޮޅަށް މަސައްކަތްކުރުމަށާއި ވަގަށް ނަގާފައިވާ މުދަލާއި ފައިސާ ހޯދުމުގެ ޕްލޭނަށް ރައްޔިތުންގެ ފުރިހަމަ ތާއީދު ލިބިފައިވާކަމަށް އޭނާ ވަނީ ސިފަކުރައްވާފައި އެވެ.

ސިންހަލާގެ އަޣުލަބިއްޔަތު އޮންނަ ގަލެވެލާ އަވަށަށް ނިސްބަތްވާ ޑިސަނަޔަކަ އަކީ ގާތްގަނޑަކަށް 25 އަހަރު ވަންދެން ރައްޔިތުންގެ މަޖިލީހުގެ މެމްބަރުކަން ކުރައްވާފައިވާ އަދި ކުރު މުއްދަތަކަށް އެގްރިކަލްޗާ މިނިސްޓަރުކަން ކުރެއްވި ބޭފުޅެއް ނަމަވެސް، އޭނާގެ އެންޕީޕީ ކޯލިޝަނަށް ނިމިގެން ދިޔަ ގާނޫނު ހަދާ މަޖިލީހުގައި ލިބިފައިވަނީ އެންމެ ތިން ގޮނޑި އެވެ.

އެގައުމުގެ ސިޔާސީ މައިދާނަށް އައި އިއްޔެގެ އިންތިހާބުގައި ބޮޑު ބަދަލެއް އައި އިރު، ޑިސަނަޔަކަގެ ކޯލިޝަނުން ވަނީ ޒަމާނުއްސުރެ ސިންހަޅަ ލީޑަރުންގެ ބާރު އޮތް އުތުރުގެ ތަމަޅަ ދަރިކޮޅުގެ މީހުންގެ މައި އަވަށް ކަމަށްވާ ޖަފްނާ ޑިސްޓްރިކްޓް ކާމިޔާބުކޮށްފަ އެވެ. މިއީ ލަންކާގެ ތާރީހުގައިވެސް ވާތުފިޔައިގެ ލީޑަރަކަށް ލިބުނު އެންމެ ބޮޑު ކާމިޔާބީގެ ގޮތުގައި ލަންކާގެ ސިޔާސީ މަޝްރަހު ދިރާސާ ކުރާ ފަރާތްތަކުން ސިފަކުރެއެވެ.

އިއްޔެ ބޭއްވި އިންތިހާބުގައި ވޯޓުލުމުގެ ހައްގު ލިބިފައިވާ މީހުންގެ ތެރެއިން ސެޕްޓެމްބަރު މަހު ބޭއްވި ރިޔާސީ އިންތިހާބުގައި ވޯޓުލުމުގެ ހައްގު ލިބިފައިވާ މީހުންގެ 80 ޕަސެންޓަށް ވުރެ މަދުން ވޯޓުލާފައިވާ ލަންކާގެ އީސީން ބުނެއެވެ.