އުދަ އަރާފާނެކަމަށް ލަފާކޮށްފައިވާތީ ބުރިޖު ހުރަސްކުރާމީހުން ސަމާލުވާން އެދިއްޖެ

މޫސުން ގޯސްވެ އުދައަރާފާނެކަމަށް ލަފާކޮށްފައިވާތީ ސިނަމާލެ ބުރިޖާއި ހަލިމަގުން ދަތުރުކުރާ ފަރާތްތަކުން ސަމާލުވުމަށް ފުލުހުން އެދިއްޖެ އެވެ.

އުދައަރާނެ ކަމަށް ލަފާކޮށް މެޓް އޮފީހުން ވަނީ ކ. އަތޮޅުން ފެށިގެން އައްޑޫ ސިޓީއާ ހަމައަށް ހުދު ސަމާލެ ނެރެފައެވެ. މި ސަމާލު ނެރެފައިވަނީ މިއަދު މެންދުރުި 1:15 އިން ފެށިގެން ހަވީރު 5:15 އާ ހަމައަށެވެ.

ފުލުހުން އެކްސްގައި ކުރި ޕޯސްޓެއްގައި ބުނެފައިވަނީ, ކ. އަތޮޅުން ފެށިގެން އައްޑޫ ސިޓީގެ ރަށްރަށަށް އުދަ އެރުމުގެ ފުރުސަތު އޮތްކަމަށް މެޓް އޮފީހުން ލަފާކޮށްފައިވާތި، ސިނަމާލެ ބްރިޖާއި ހައިވޭގައި ދަތުރުކުރައްވާ ފަރާތްތަކުން ސަމާލުވުމަށް އެދޭ ކަމަށެވެ.

އަދި ރަށްރަށުގައި ވެސް ގޮނޑުދޮށާ ކައިރި ހިސާބުތަކުގައި ދިރިއުޅުއްވާ ފަރާތްތަކުން މުދަލާއި ގެދޮރުގެ ސަލާމަތާއި ރައްކާތެރިކަމަށް އަޅަންޖެހޭ ފިޔަވަޅުތައް އެޅުއްވުމަށްވެސް ފުލުހުން ވަނީ އިލްތިމާސްކޮށްފައެވެ.