ބޯޑަރަށް ވަންނަ އުޅަނދުފަހަރު މޮނިޓާ ކުރުމަށްޓަކަ ކަސްޓަމްސްއަށް ޑްރޯންތަކެއް ގެންނަނީ!

ރާއްޖޭގެ ބޯޑަރަށް ވަންނަ އުޅަނދުފަހަރު މޮނިޓާ ކުރުމަށްޓަކައި މޯލްޑިވްސް ކަސްޓަމްސް ސާވިސްއަށް ޑްރޯންތަކެއް ގެންނަން ނިންމާފައިވާ ކަމަށް އެ މުއައްސަސާ އިން ބުނެފިއެވެ.

ކަސްޓަމްސްގެ އިސްވެރިން މިއަދު ވަނީ ރައްޔިތުންގެ މަޖިލީހުގެ 241 ކޮމިޓީއަށް ހާޒިރުކޮށްފައި އެވެ. މިއަދު ކޮމެޓީގައި ކަސްޓަމްސްގެ މަސައްކަތްތަކާއި ގުޅޭގޮތުން އެމުވައްސަސާގެ ކޮމިޝަނާ ޖެނަރަލް އޮފް ކަސްޓަމްސް ޔޫސުފް މާނިއު ވިދާޅުވީ ރާއްޖޭގެ ބޯޑަރު ބެލެހެއްޓުމުގެ ފުރިހަމަ ގާބިލުކަން މިވަގުތު ކަސްޓަމްސްގައި ނެތް ކަމަށާއި ރާއްޖެ ވަންނަ އުޅަނދުތައް މޮނީޓާކޮށް އެ އުޅަނދުތަކާ ހަމައަށް ދަތުރުކުރުމުގެ ގާބިލުކަން ވެސް ކަސްޓަމްސްގައި ނެތް ކަމަށެވެ.

އެކަމުގެ ސަބަބުން އުޅަނދު ފަހަރު ރަނގަޅަށް މޮނިޓާ ކުރުމަށް ދަތިވެ، ހުއްދަ ނޫން އެއްޗެހި ރާއްޖެ އެތެރެކުރުމަށް ފުރުސަތު ލިބޭ ކަމަށްވެސް ވިދާޅުވިއެވެ.

މި މައްސަލަތައް ހައްލުކުރުމަށްޓަކައި ކުރަމުންދާ މަސައްކަތުގެ ދަށުން ކުރިއަށް އޮތް ތަނުގައި ޗައިނާއާއި އެމެރިކާ އިން ޑްރޯންތަކެއް ގެންނަން ހަމަޖެހިފައިވާކަން މާނިއު ހާމަކުރެއްވި އެވެ. އަދި ކަސްޓަމްސްއަށް ޑްރޯންތައް ގެނަޔަސް އެ ތަކެތި އޮޕަރޭޓް ކުރުމުގެ މަސައްކަތް ކުރާނީ އެމްއެންޑީއެފްގައި އަލަށް އުފެއްދި އެއާކޯއާ ގުޅިގެން ކަމަށާއި އެކުގައި މަސައްކަތް ކުރުމަށް އެހީތެރިކަން ބަދަލުކުރުމަށް އެއްބަސްވުމެއް އެމްއެންޑީއެފްއާއި އެކު ގާއިމްކޮށްފައިވާކަން މާނިއު ހާމަކުރެއްވި އެވެ.

މާނިއު އިތުރަށް ވިދާޅުވީ ޖަޕާނު ސަރުކާރުން 85 ފޫޓުގެ އުޅަނދަކާއި ޗައިނާ ސަރުކާރުން ދެ އުޅަނދަކާއި އެމެރިކާ އިންވެސް އުޅަނދެއް ލިބޭ ގޮތަށް ހަަމަޖެހިފައިވާ ކަމަށެވެ.