ރާއްޖެއަށް އެއްވެސް ހަުރަހެއް ނެތި ހަތިޔާރު ގެނައުމަށް ހުޅުވާލެވިފައިވާ ކަމަށް ބުނެ ޚަބަރުތަކުގައި ލިޔެވިފައިވަނީ މަފްޙޫމު އޮޅޭގޮތަށް - ކަސްޓަމްސް

ރާއްޖެއަށް އެއްވެސް ހަުރަހެއް ނެތި ހަތިޔާރު ގެނައުމަށް ހުޅުވާލެވިފައިވާ ކަމަށް ބުނެ ޚަބަރުތަކުގައި ލިޔެވިފައިވަނީ މަފްޙޫމު އޮޅޭގޮތަށް ކަމަށް ކަސްޓަމްސްއިން ބުނެފި އެވެ.

ކަސްޓަމްސްއިން މިރޭ ނެރުނު ބަޔާނެއްގައި ބުނީ ހަބަރުތަކުގައި ތަސައްވުރު ކުރެވިފައިވާ "ހަތިޔާރު" ނުވަތަ "ހަނގުރާމަވެރި ހަތިޔާރު" އެއްވެސް ހުރައެއް ނެތި ރާއްޖެއަށް ގެނައުމަށް ހުޅުވާލެވިފައިވާ ކަމަށް އެއިދާރާއިން ބުނި ކަމަށް ދޭހަވާގޮތަށް ޚަބަރުތަކުގައި ލިޔެވިފައިވަނީ މަފްޙޫމު އޮޅޭގޮތަށް ކަމަށެވެ.

އެގޮތުން ރައްޔިތުންގެ މަޖިލީހުގެ ސަލާމަތީ ޚިދުމަތްތަކާބެހޭ ކޮމިޓީގެ އެދިވަޑައިގަތުމަށް, ކަސްޓަމްސްއިން ވަނީ މިއަދު އެ ކޮމިޓީއަށް ހާޒިރުވެ, ކޮމެޓީގެ މެންބަރުން ކުރެއްވި ސުވާލުތަކަށް ޖަވާބުދީފައިވާ ކަމަށާއި މައިގަނޑު ގޮތެއްގައި ސުވާލުތައް އަމާޒުވީ ރާއްޖެއަށް މަސްތުވާތަކެތި އެތެރެކުރުމާއި, ސިއްރުން ނުވަތަ ޤާނޫނާ ޚިލާފަށް ރާއްޖެއަށް ތަކެތި އެތެރެކުރުން ހުއްޓުވުމުގައި ކަސްޓަމްސްއަށް ހުރި ގޮންޖެހުންތަކާއި ބެހޭ ގޮތުން ކަމަށެވެ.

މި ބައްދަލުވުމުގައި ރާއްޖޭގެ ބައިނަލްއަޤްވާމީ ބަނދަރުތައް ބެލެހެއްޓުމުގައި ހުރި ގޮންޖެހުންތަކާއި ރާއްޖޭގެ ސަރަޙައްދީ ކަނޑުގެ ސަރަޙައްދު ބެލެހެއްޓުމުގައި ކަސްޓަމްސްއަށް ހުރި ގޮންޖެހުންތައް ފާހަގަކޮށްފައިވާނެ ކަމަށާއި އެގޮތުން, ރާއްޖެއަށް މަސްތުވާތަކެތި އެތެރެކުރާ ފަރާތްތަކުން ބަނދަރަށް އައުމުގެ ކުރިން ކަނޑުމަތިން އެތަކެތި ލޯކަލް އުޅަނދުފަހަރުގައި ބާލައިގެން ފަޅު ރަށްރަށަށް ގެންގޮސް އެތެރެކުރާ ކަމުގެ މުޢުތަބަރު މަޢުލޫމާތު ކަސްޓަމްސްއާއި ދިވެހި ފުލުހުންގެ ޚިދުމަތަށް ލިބޭ ކަމާއި ސަލާމަތީ ޚިދުމަތްތަކާބެހޭ ކޮމިޓީއަށް މީގެ ކުރިން ދިވެހި ފުލުހުންގެ ޚިދުމަތުން އެ މަޢުލޫމާތު ހިއްސާކޮށްފައިވާކަން ފާހަގަކޮށް, އެ މަގުން ތަކެތި އެތެރެކުރެވޭނަމަ, ހަމައެކަނި މަސްތުވާތަކެތި އެތެރެކުރާނެ ކަމަށް ވިސްނައިގެން ނުވާނެ ކަމާއި , ޤާނޫނާއި ގަވާއިދާ ޚިލާފު އެހެނިހެން ތަކެތިވެސް އެތެރެކުރުމުގެ ފުރުސަތު އޮންނާނެތީ އެކަން ހުއްޓުވުމަށްޓަކައި, ސަރަޙައްދީ ޤައުމުތަކުގެ މެދުގައި މަޢުލޫމާތު ޙިއްސާކުރުމާއި ސަރވައިލަންސް އާއި މޮނިޓަރިންގ އިތުރަށް ހަރުދަނާކުރުމުގެ މަސައްކަތް, ރާއްޖެއާއި ރާއްޖެއިން ބޭރުގެ ކަމާބެހޭ ފަރާތްތަކާއި ގުޅިގެން ކުރަމުންދާކަން ވާނީ ފާހަގަކޮށްފައި ކަމަށް ކަސްޓަމަސްއިން ބުނެއެވެ.

ކަސްޓަމްސްއިން އިތުރަށް ބުނީ ދިވެހިރާއްޖޭގެ ސަލާމަތާއި ރައްކާތެރިކަން ކަށަވަރު ކުރުމަށްޓަކައި މޯލްޑިވްސް ނޭޝަނަލް ޑިފެންސް ފޯސް އިން ރާއްޖޭގެ ސަރަޙައްދު ކަނޑާއި ވައިގެ މަގުން 24 ގަޑިއިރު ބަލަހައްޓަމުންދާއިރު, ކަސްޓަމްސްއިން ބަލަންޖެހޭ ކަންކަންވެސް މޯލްޑިވްސް ނޭޝަނަލް ޑިފެންސް ފޯސްއާ ގުޅިގެން ބަލަހައްޓަމުންދާކަމަށެވެ. މިގޮތުން ދުރާލައި އުޅަނދުފަހަރު އައުމުގެ ކުރިން އެއާބެހޭ މަޢުލޫމާތު ހޯދައި ރިސްކުތައް ދެނެގަނެ ރިސްކު އޮންނަ ޙާލަތުގައި މޯލްޑިވްސް ނޭޝަނަލް ޑިފެންސް ފޯސްއާއި މޯލްޑިވްސް ޕޮލިސް ސަރވިސްއާ ގުޅިގެން ޚާއްސަ އޮޕަރޭޝަންތައް ހިންގޭ ކަމަށާއި މި ކަންކަން ހަރުދަނާ ކުރުމަށްޓަކައި މި މުއައްސަސާތަކުގެ މެދުގައި މަޝްވަރާކޮށް, މުވައްޒަފުންގެ ޤާބިލުކަން އިތުރުކުރުމަށް ރާއްޖެއާއި ރާއްޖެއިން ބޭރުގައި ޚާއްސަ ތަމްރީނުތައް ދެވެމުންދާކަން ކަސްޓަމްސްގެ ބަޔާނުގައި ވަނީ ފާހަގަކޮށްފައެވެ.

އަދ،ި ރީޖަނަލް ޤައުމުތަކުގެ މެދުގައި މަޢުލޫމާތު ޙިއްސާކުރުމާއި ސަރވައިލަންސް އާއި މޮނިޓަރިންގ އިތުރަށް ހަރުދަނާކުރުމުގެ މަސައްކަތް, ރާއްޖެއާއި ރާއްޖެއިން ބޭރުގެ ކަމާބެހޭ ފަރާތްތަކާއި ގުޅިގެން ކުރުމަށް މަސައްކަތްކުރަމުންދާކަންވެސް ވަނީ ފާހަގަކޮށްފައި އެވެ.

ކަސްޓަމްސްގެ ބަޔާން ނިންމާލަމުން ބުނެފައިވަނީ ދިވެހިރާއްޖެއަށް މަސްތުވާތަކެތި އެތެރެވުން ހުއްޓުވުމުގައި ސަރުކާރުގެ ސިޔާސަތުތަކާއި އެއްގޮތަށް ކަސްޓަމްސްއިން ތަންފީޒްކުރަންޖެހޭ ޤާނޫނުތަކާއި ގަވާއިދުތައް ތަންފީޒްކުރުމުގައި ސާބިތުކަމާއެކު ދެމިތިބޭނެކަމުގެ ޔަޤީންކަން އެންމެހައި ދިވެހި ލޮބުވެތި ރައްޔިތުންނަށް އަރުވާ ކަމަށެވެ.