ޗައިނާގެ އިންޑަސްޓްރިއަލް ކޮމާޝަލް ބޭންކްގެ އިސްވެރިންނާއި މިނިސްޓަރު ސައީދު ބައްދަލުކުރައްވައިފި

ޗައިނާ އިންޑަސްޓްރިއަލް އެންޑް ކޮމާޝަލް ބޭންކް (އައިސީބީސީ)ގެ ސީނިއާ އެގްޒެކެޓިވްސްއާ އިކޮނޮމިކް މިނިސްޓަރު މުހައްމަދު ސައީދު ބައްދަލު ކުރައްވައިފިއެވެ.

އެކްސްގައި ކުރެއްވި ޕޯސްޓެއްގައި މިނިސްޓަރ ސައީދު ވިދާޅުވީ, މީގެ ކުޑައިރުކޮޅެއް ކުރިން ޗައިނާ އިންޑަސްޓްރިއަލް އެންޑް ކޮމާޝަލް ބޭންކް (އައިސީބީސީ)ގެ އިސް ވެރިންނާ ބައްދަލުކުރައްވާފައިވާ ކަމަށެވެ. މި ބައްދަލުކުރެއްވުމުގައި ގުޅިގެން ކުރެވިދާނެ ކަންކަމާ ބެހޭ ގޮތުން ވަނީ މަޝްވަރާކުރައްވާފައެވެ.

މިނިސްޓަރ ސައީދު ވިދާޅުވީ, މި ބައްދަލުކުރެއްވުމަކީ, ރައީސުލްޖުމްހޫރިއްޔާ ޑރ. މުހައްމަދު މުއިއްޒު ޗައިނާއަށް ކުރެއްވި ރަސްމީ ދަތުރުފުޅާއި ގުޅިގެން ބޭއްވުނު ބައްދަލުކުރެއްވުމެއް ކަމަށެވެ.

މިނިސްޓަރ ޗައިނާއަށް ކުރައްވާ މިދަތުރުފުޅަކީ, ޗައިނާގައި ކުރިއަށްދާ "ސަމާ ޑާވޯސް ފޯރަމް" ގައި ބައިވެރިވަޑައިގަތުމަށް ކުރައްވާ ދަތުރުފުޅެކެވެ.