ފުލުހުންނަށް ފިލަންވެގެން ތިން އިމާރާތުން ރެކިގެން ދެވަނަ ގޭގައި ވައްކަން ކުރަނިކޮށް، ވަގެއް ފުލުހުންގެ އަތްދަށުވެއްޖެ

ފުލުހުންނަށް ފިލަންވެގެން ތިން އިމާރާތަކުން ފުންމި ވަގަކު، ދެވަނަ ތަނަކުން ވައްކަން ކުރަނިކޮށް ފުލުހުންގެ އަތްދަށުވެއްޖެއެވެ.

އޭނާ ފުލުހުންގެ އަތްދަށުވެފައިވަނީ ފާމުދޭރީ މަގުގައި ހުންނަ އުރީދޫގެ ފިހާރައިން ވައްކަންކޮށްގެން، ފުލުހުންގެ ފަރާތުން ފިލުމަށް ތިން ގެއެއް ހުރަސްކުރުމަށްފަހު ވަދެވުނު ގެއެއްގައި ތިބި ބަޔަކަށް ފެނި، ފުލުހުންނަށް ރިޕޯޓުކުރުމުންނެވެ.

އެ ގެއަކީ އޭނާ ވައްކަން ކުރި އުރީދޫ ހުންނަ އިމާރާތުން ވައްކަންކޮށްގެން، އެ ގެއާ ތިންވަނައަށް އިންވެގެން ހުރި ގޭގެ ހަވަނަ ފަންގިފިލާގައި ހުރި ވައިގޮޅިން ފޭބި، އެގޭގެ ދެވަނަ ފަންގިފިލާގައި ހުންނަ ގެއެވެ. އެގެއަށް އޭނާ ވަދެފައިވަނީ ފާހަނާއިން ކަމަށްވާއިރު، އޭނާ ވައްކަން ކުރަނިކޮށް ފެނުނީ އެ ގެގޭއި ދިރިއުޅޭ ދެމަފިރިއަކަށެވެ.

އެގޮތުން އެ ޙާދިސާގެ ވާހަކަ ހިއްސާކުރަމުން ވަގު ފެނުނު މީހާ އެކްސްގައި ކުރި ޕޯސްޓެއްގައި ބުނީ އެ މީހުން ފެނުމާއެކު އެގެއަށް ވަނީ ގޭންގަކުން ވަޅި ޖަހައިފާނެތީ ބިރުން ކަމަށް ވަގު ބުނި ކަމަށެވެ. އެހެން ނަމަވެސް ފުލުހުންނަށް ރިޕޯޓުކޮށް ބެލި ބެލުމުން އެނގުނީ އޭނާ އަކީ އެގެއާ ތިންގެ އިންވެގެން ހުންނަ އުރީދޫ ފިހާރައިން ވައްކަންކުރުމުގެ ސަބަބުން ފުލުހުން ހޯދަމުން އަންނަ މީހެއް ކަމަށް އެ ޕޯސްޓުގައި އެ މީހާ ބުންޏެވެ.

އެކަމާ ގުޅިގެން ފުލުހުން ބުނީ ފާމްދޭރީ މަގުގައި ހުންނަ އުރީދޫގެ އިމާރާތުގެ ތެރެއަށް ފިރިހެނަކު ވަދެގެން 5:50 ހާއިރު ރިޕޯޓުކުރި ކަމަށާއި، ފާހަނާއިން އެގެއަށް ވަދެ، އެގޭގެ ބައެއް ތަކެއްޗަށް އޭނާ ގެއްލުންދީފައިވާ ކަމަށެވެ.