ރައީސްގެ ޚާއްޞަ އިރުޝާދުގެ ދަށުން 15 އަތޮޅެއްގައި އަލަަށް ޕަބްލިކް ވާރކްސް ސައިޓް ގާއިމްކުރަނީ

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޚާއްޞަ އިރުޝާދުގެ ދަށުން ރާއްޖޭގެ 15 އަތޮޅެއްގައި މުޅިން އަލަށް ޕަބްލިކް ވާރކްސް ސައިޓް ގާއިމްކުރުމަށް، އަންނަ އަހަރުގެ ބަޖެޓްގައި ހިމަނުއްވާނެ ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާއިބެހޭ ވަޒީރު އާދަމް ޝަރީފް ޢުމަރު ވިދާޅުވެއްޖެއެވެ.

އެ މަނިކުފާނު މިފައިން ވިދާޅުވީ، އިދާރީ ދާއިރާތަކުގެ އާންމު މަސައްކަތްތައް ހަރުދަނާކުރުމުގެ މަސައްކަތު ބައްދަލުވުން އިފްތިތާޙު ކޮށްދެއްވުމަށް ސްޓެލްކޯ މާލަމްގައި އެވުޒާރާގެ ފަރާތުން މިއަދު ބޭއްވި ބައްދަލުވުމުގައި ދެއްކެވި ވާހަކަފުޅުގައެވެ.

މިނިސްޓަރ އިތުރަށް ވިދާޅުވީ އަލަށް ގާއިމްކުރާ ސައިޓްތައް ގާއިމްކުރެއްވި ނަމަވެސް، މިހާރު ހުރި ސައިޓްތަކުގައި ރަނގަޅުކުރަންޖެހޭ ވަރަށް ގިނަ ކަންތައްތައް ހުރިކަމަށާއި، އެ މަސައްކަތްތައް މިހާރު ވެސް ކުރައްވަމުން ގެންދަވާކަމަށެވެ. މިއަދު މިފެށޭ މަސައްކަތުގެ ބައްދަލުވުމަކީ ވެސް އެއިގެ ތެރެއިން ކުރިއަށް ގެންދެވޭ ކަމެއްގެ ގޮތުގައި މިނިސްޓަރ ފާހަގަކުރެއްވިއެވެ.

ވަޒީރު ވިދާޅުވީ ރާއްޖޭގައި ޕަބްލިކް ވާރކްސްގެ ޚިދުމަތް ދެމުންގެންދާތާ ގާތްގަޑަކަށް 30 އަހަރުވެފައިވާ އިރު ރާއްޖޭގެ ގިނަ ޕަބްލިކް ވާރކްސް ސައިޓްތައް ހުރީ ވީރާނަވެފައިކަމަށާއި އެ ފަދަ ތަންތައް ވެސް ރަނގަޅުކުރުމުގެ މަސައްކަތް ވެސް ކުރިއަށްގެންދިއުުގެ މަގުފަހިވެގެންދާނެ ކަމަށެވެ.

2 ދުވަހުގެ މުއްދަތަށް ކުރިޔަށް ގެންދާ މި މަސައްކަތު ބައްދަލުވުން ފައްޓަވައި ދެއްވީ މާލީ ވަޒީރު ޑޮކްޓަރ މުޙައްމަދު ޝަފީޤެވެ. މި ރަސްމިއްޔާތު ޝަރަފުވެރިކޮށްދެއްވާ މާލީ ވަޒީރު ދެއްކެވި ވާހަކަފުޅުގައި ޕަބްލިކް ވަރކްސްގެ ޚިދުމަތަކީ މުހިންމު ޚިދުމަތެއްކަމާ އެ ޚިދުމަތުގެ ސަބަބުން ދައުލަތުގެ ޚަރަދުބަރަދުތައް އެތައް ގުނައެއް ކުޑަކުރެވިދާނެ ކަމުގައި ވިދާޅުވިއެވެ. އަދި ވަގުތުގެ ބޭނުން ހެޔޮ ގޮތުގައި ހިފުމަށް ބައިވެރިންގެ ކިބައިން ވަޒީރު އެދިލެއްވިއެވެ.

މި މަސައްކަތު ބައްދަލުވުމުގައި ޕަބްލިކް ވަރކްސް ޚިދުމުގައި އަތޮޅުތެރޭގެ 7 ސަރަޙައްދެއްގައި ހިނގަމުންދާ ޕަބްލިކްވަރކްސް ޔުނިޓްތަކުގެ ވެރިންނާއި އިދާރީ ބައެއް މުއައްޒިފުންގެ އިތުރަށް ވުޒާރާގެ ބައެއް ވެރިންނާއެކު ޖުމްލަ 37 ބޭފުޅުން ބައިވެރިވެލައްވައެވެ.