ފެމިލިއަރައިޒޭޝަން ދަތުރެއްގައި ޖަޕާނުގެ ނޫސްވެރިންތަކެއް ރާއްޖެއަަށް!

މޯލްޑިވްސް މާކެޓީންގ އެންޑް ޕަބްލިކް ރިލޭޝަން ކޯޕަރޭޝަން, އެމްއެމްޕީއާރްސީއިން ރާއްޖެ އިސްތިހާރުކުރުމަށް ކުރިއަށް ގެންދާ ޕެމިލިއަރައިޒޭޝަން ދަތުރެއްގައި ބައިވެރިވުމަށް ޖަޕާނުގެ ބޮޑެތި މީޑިއާތަކުގެ ތަޖުރިބާކާރުން ހިމެނޭ ޓީމެއް ރާއްޖެ އަތުވެއްޖެއެވެ.

އެމްއެމްޕީއާރްސީއިން ބުނީ މި ދަތުރަކީ މިމަހުގެ 17 ވަނަ ދުވަހުން ފެށިގެން މިމަހުގެ 24 ވަނަ ދުވަހުގެ ނިޔަލަށް ޖަޕާނުގެ އެކި މީޑިއާ އައުޓްލެޓުގެ ނޫސްވެރިން ރާއްޖެއަށް ކުރަމުން އަންނަ ދަތުރެއް ކަމަށެވެ.

އެގޮތުން މި ނޫސްވެރިން ރާއްޖޭގެ ތިން ރިސޯޓެއް ކަމަށްވާ ހުވަފެންފުށި، މޮވެންޕިކް ރިސޯޓް ކުރެދިވަރު އެންޑް ލަކްސް* ސައުތު އަރިގައި ފަތުރުވެރިކަމުގެ ދާއިރާގެ މަޝްހޫރު މެހްމާންދާރީ ތަޖުރިބާކޮށް، ރިޒޯޓުން ލިބޭ ތަފާތު ޚިދުމަތްތަކާއި، ކެއުންތަކަށް އިންސާފުކުރާނެއެވެ. އަދި މި ދަތުރުގައި ކުރާ ތަޖުރިބާތަކާއި، ޓީމު ތިބޭ ރިޒޯޓުތަކުގެ މައުލޫމާތު ހިމެނޭ ސޯޝަލް މީޑިއާ ޕޯސްޓްތަކާއި، އާޓިކަލްތައް މި މީޑިއާތަކުގައި ޝާއިޢުކުރާނެއެވެ.

މިދަތުރުގައި ހިމެނެނީ ވޯގް ޖަޕާން އޮންލައިން، ސީ.އާރް.އީ.އޭ ވެބް، ނިއުމެރޯ, ޓޯކިޔޯ,ޖޭޕީ އަދި މައިނަވީ ވުމަންގެ ނޫސްވެރިންގެ ބައިވެރިވެއެވެ.

މި ދަތުރު އިންތިޒާމް ކޮށްފައިވަނީ އެމް.އެމް.ޕީ.އާރުސީއިން ޖަޕާނު މާކެޓަށް ޚާއްސަކޮށް ގެންގުޅޭ މާކެޓިން ސްޓްރެޓަޖީގެ ދަށުންނެވެ. މި ސްޓްރެޓަޖީގެ މަޤްސަދަކީ ރާއްޖޭގެ ފަތުރުވެރިކަމުގެ ދާއިރާގެ އެންމެ ފަހުގެ މައުލޫމާތާއި، ޓްރެވަލް ގައިޑްލައިންސްތައް ޖަޕާނުގެ ފަތުރުވެރިންނާ ހަމައަށް ފޯރުކޮށްދިނުމެވެ.

ރާއްޖޭގެ ޓުއަރިސްޓު އެރައިވަލްސްގައި މިވަގުތު 13 ވަނައިގައި އޮތް ޖަޕާން، 2024 ވަނަ އަހަރުގެ އޭޕްރީލް މަހުގެ ނިޔަލަށް 9،333 ޓޫރިސްޓުން އައިސްފައިވެއެވެ.