އޭޝިއާ ޕެސިފިކް ބްލޫ އެކޮނޮމީ ފޯރަމް މާދަމާ ރާއްޖޭގައި ފަށަނީ

ޔޫއެންޑީޕީއިން އިސްނަގައިގެން ބާއްވާ އޭޝިއާ ޕެސިފިކް ބްލޫ އެކޮނޮމީ ފޯރަމް މާދަމާ ރާއްޖޭގައި ފެށުމަށް ނިންމައިފި އެވެ.

އޭޝިއާ ޕެސިފިކް އިކޮނޮމީ ބްލޫ ފޯރަމް ރާއްޖޭގައި ބާއްވަނީ އިކޮނޮމިކް މިނިސްޓްރީއާއި ޔޫއެންޑީޕީގެ ކްލައިމެޓް ފައިނޭންސް ނެޓްވޯކުގެ އިތުރުން އިނގިރޭސިވިލާތުގެ ފޮރިން ކޮމަންވެލްތު އެންޑް ޑިވަލޮޕްމެންޓް އޮފީސް ގުޅިގެންނެވެ.

މި ފޯރަމްއަކީ ކަނޑުގެ ވަސީލަތްތައް ދެމެހެއްޓެނިވި ގޮތެއްގައި ބޭނުންކޮށްގެން ވަޒީފާ އުފެއްދުމާއި ދިރިއުޅުން ރަނގަޅުކުރުމާއި ކަނޑުގެ ދިރުންތައް ރައްކާތެރިކޮށް އިގުތިސާދީ ކުރިއެރުމަށް އެހީތެރިވުމަށް ކުރިއަށް ގެންދާ މުހިއްމު ފޯރަމެކެވެ.

މި ފޯރަމާއި ގުޅޭގޮތުން އެކްސްގައި މިނިސްޓަރ ސައީދު ކުރެއްވި ޕޯސްޓެއްގައި ވިދާޅުވީ މި ފޯރަމް ރާއްޖޭގައި ކޯ ހޯސްޓު ކުރަން ލިބުމުން އެކަމާ މެދު ފަހުރުވެވަޑައިގެންނަވާ ކަމަށެވެ. އަދި ކްލައިމެޓް ފައިނޭންސް ނެޓްވޯކް (ސީއެފްއެން) ގެ ގައުމުތަކުން އިސްވެރިން އެ ފޯރަމްގައި ބައިވެރިވެވަޑައިގަންނަވާކަން ފާހަގަކުރައްވާ އެކަމަށްޓަކައި މިނިސްޓަރު ވަނީ މަރުހަބާ ވިދާޅުވެފައެެވެ.

މިނިސްޔަރ އިތުރަށް ވިދާޅުވީ އެ ފޯރަމްގައި ރާއްޖެއަށް ސީދާގޮތުން އަސަރުކުރާނެ މުހިއްމު ނިންމުންތަކެއް ނިންމަވާނެ ކަމަށެވެ.

މިމަހުގެ 14 ވަނަ ދުވަހުގެ ނިޔަލަށް ކުރިޔަށްދާ މި ފޯރަމް ބާއްވަން ނިންމާފައިވާ ވަކި ތަނެއް އެކޮނޮމިކް މިނިސްޓްރީއިން ހާމައެއް ނުކުރެއެވެ. މި ފޯރަމްގައި ޖުމުލަ 12 ގައުމަކުން 100 އަށްވުރެ ގިނަ އިސްވެރިން ބައިވެރިވެވަޑައިގަންނަވާނެ އެވެ.