ކުޑަކުދިންގެ ދުވަހުގެ ޚިތާބުގައި ރައީސް ފާޅުކުރެއްވީ ފަލަސްތީނުގެ ކުޑަކުދިން، ޙައްޤުތަކުން މަޙްރޫމުވެފައިވުމުގެ ކަންބޮޑުވުމާއި ހިތާމަ!

އިސްރާއީލުގެ އަނިޔާވެރި އަތްތަކުގެ ޝިކާރައަކަށްވެ، ޙައްޤުތަކުން މަޙްރޫމުވެފައިވާ ފަލަސްތީނުގެ ކުޑަކުދިންގެ ކަންބޮޑުވުމާއި ހިތާމަ ރައީސް ޑރ. މުޙައްމަދު މުޢިއްޒު ފާޅުކުރައްވައިފިއެވެ.

ބައިނަލްއަގުވާމީ ކުޑަކުދިންގެ ދުވަހުގެ މުނާސަބަތުގައި ރައީސް ދެއްވި ޚިތާބުގައި ރައީސް މުޢިއްޒު ވިދާޅުވީ، ކުޑަކުދިންގެ ދުވަހަކީ ހިތަށް އުފާވެރި އަދި އުންމީދީ އިޙްސާސްތަކެއް ވެރިވާ ދުވަހަކަށް ވީ ނަމަވެސް، އެމަނިކުފާނުގެ ހިތްޕުޅަށް އެންމެ އަސަރުކުރުވާ ކަމަކީ ފަލަސްތީނުގެ ކުޑަކުދިންގެ ޙާލަތާ މެދު ކަމަށެވެ.

އެގޮތުން އިސްރާއީލުގެ އަނިޔާވެރި އަތްތަކުގެ ޝިކާރަކަށްވެ، އެ ކުދިން ވަނީ ޙައްޤުތަކުން މަޙްރޫމުވެފައިވާކަމުގެ ކަންބޮޑުވުން ފާޅުކުރައްވަމުން ރައީސް ވިދާޅުވީ، އެ ކުދިންނަކީ މި އުންމަތުގެ ދަރިން ކަމަށެވެ.

"ކުޑަކުދީންގެ ދުވަހެއްގައި، ހިތަށް ވެރިވާ އުފާވެރި އަދި އުންމީދީ އިޙްސާސްތަކާއެކު، މިއަދު އަޅުގަނޑަށް ހިތާމަވެރި އަސަރުކުރުވާކަމެއްވެސް އެބައޮތެވެ. އެއީ، ފަލަސްޠީނުގެ ބިމުގައި އަނިޔާ ލިބި، ބިކަ ހާލުގައި ޖެހެމުންދާ އެތައް ހާސް ކުޑަކުދީންނެވެ. އިޒްރޭލުގެ އަނިޔާވެރި އަތްތަކުގެ ޝިކާރައަކަށްވެ، ޙަޔާތުގެ ޅަނދޮޅު ފޯވަހީގެ އެންމެ ހިތްފަހި ދުވަސްތަކުގެ އުފަލާއި، ތަޢުލީމާއި، ޢާއިލީ ލޯބިން މަޙްރޫމްވަމުން އެދާ މަޢުޞޫމް ކުދީންނަކީ ހަމަ އަޅުގަނޑުމެންގެވެސް ދަރީންނެވެ،" ރައީސް މުޢިއްޒު ވިދާޅުވިއެވެ.

އެ ޚިތާބުގައި ރައީސް ވަނީ އެ ކުދިންގެ ތެރެއިން ޝަހީދުވާ ކުދިންނަށް މާތް ﷲ ސުވަރުގޭގެ ނިޢުމަތް މިންވަރުކުރެއްވުމަށާއި އަދި އަނިޔާލިބި ގެދޮރު ގެއްލި ނިކަމެތިވާ ކޮންމެ ކުއްޖަކަށް މާތް ﷲގެ ރަޙްމަތާއި މަދަދުގެ ހާސްދޮރު ހުޅުއްވުމަށް އެދި ދުޢާކުރައްވާފައެވެ.

މީގެ އިތުރުން އެ ޚިތާބުގައި ރައީސް ވަނީ އުފަން ދަރީން ނޫނަސް، ކޮންމެ ކުޑަކުއްޖަކީ ވެސް ދަރިއެއްކަމުގައި ދެކި ކޮންމެ ކުއްޖަކާ މެދު ވެސް އޯގާތެރިކަމާއި، ލޯތްބާއެކު މުުއާމަލާތް ކުރުމަށް ރައްޔިތުންގެ ކިބައިން އެދިވަޑައިގަންނަވައިފައެވެ.

އެގޮތުން ޖަމީލް ދީދީގެ "ހައްތަހާ ވެސް ދަރީން" ވާހަކައަސް އިޝާރަތްކުރައްވަމުން ރައީސް ވިދާޅުވީ އެ ވާހަކައިން ވެސް ލިބިދޭ އެންމެ ބޮޑު ފިލާވަޅަކީ، އުފަން ދަރީން ނޫނަސް، އަމިއްލަ ދަރިއެއް ކަމުގައި ދެކި ލޯތްބާއި އިޙްތިރާމާ އެކު އެ ކުއްޖަކު ބަލައި ބޮޑުކުރާ މީހެއްގެ ނަފްސާއި ރޫޙަށް ލިބޭނެ ހަމަޖެހުން ކަމަށާއި، އެކަމަކީ ވިސްނައިލުން މުހިންމު ކަމެއް ކަމަށެވެ.

"މި ހުރިހާ ކަމަކާއެކު، އަޅުގަނޑުމެން ކޮންމެ ބޮޑު މީހެއްގެ ކޮނޑުގައި އެޅިފައިވާ ވަރަށް މުހިންމު ދީނީ، އިންސާނީ، އަދި ޤައުމީ މަސްއޫލިއްޔަތެއް އެބައޮތެވެ. އެއީ، ކުޑަކުދީންނަށް ރައްކައުތެރިކަންދީ، ރީތި ނަމޫނާ ދައްކާ، ހެޔޮމަގަށް އެކުދީންގެ ސުލޫކު ބައްޓަންކުރަން މަގުދައްކައިދިނުމުގައި ހަމަ ކޮންމެ މީހަކުވެސް ދެމިހުރުމެވެ. މަރުޙޫމް މުޙައްމަދު ޖަމީލް ދީދީ އެ ވިދާޅުވި ފަދައިން، "ހައްތާވެސް ދަރީން" ކަމުގައި ދެކި، ކޮންމެ ކުއްޖަކާމެދުވެސް ދަރިކުލުނާ އިމެއްމިނެއް ނެތް ތެދުވެރި ލޯތްބާއެކު މުޢާމަލާތު ކުރުމެވެ،" ރައީސް މުޢިއްޒު ވިދާޅުވިއެވެ.

ރައީސް ވިދާޅުވީ ކީރިތީ ރަސޫލާގެ ސީރަތުން ވެސް އިންސާނިއްޔަތަށް ފެންނަން އޮތް ފަދައިން، އިސްލާމީ އުސޫލުތަކަށް ކަމޭހިތައި، ޤައުމު އިސްކުރާ އަދި ގޮތްހުރި އުޅުންހުރި ޖީލެއްގެ ގޮތުގައި ދިވެހި ކުޑަކުދިން ބޮޑެތި ކުރުމަކީ އެންމެންގެ ކޮޑުގައި އެޅިފައިވާ ޒިންމާއެއް ކަމަށެވެ.