އިންޑިއާ ސިފައިން
ރާއްޖެ އާއި އިންޑިއާއާ ދެމެދު ގާއިމު ކުރި އެއްބަސްވުމުގެ ދަށުން ރާއްޖޭގައި ތިބި އިންޑިއާގެ ސިފައިންގެ ދެވަނަ ފްލެޓޫން އަނބުރާ އިންޑިއާއަށް ފޮނުވާލައިފި އެވެ.
މިކަން ހާމަކުރެއްވީ ރައީސް ޑރ މުހައްމަދު މުއިއްޒު އެވެ. އެގޮތުން މިހާރު އައްޑޫ ސިޓީއަށް ކުރައްވަމުން އަންނަ ރަސްމީ ދަތުރުފުޅުގެ ތެރެއިން މިރޭ އެސިޓީގައި އޮތް ކެމްޕެއިން ޖަލްސާއެއްގައި ވާހަކަފުޅު ދައްކަވަމުން ރައީސް ވަނީ ރާއްޖެއާ އިންޑިއާއާ ދެމެދު ވެފައި އޮތް އެއްބަސްވުމާ އެއްގޮތަށް ސިފައިން ފޭބުމުގެ މަސައްކަތް ހިނގަމުން އަންނަ ކަން ފާހަގަކުރައްވާފައި އެވެ.
ރައީސް ވިދާޅުވީ އިންޑިއާ ސިފައިން ރާއްޖެއިން ފޮނުވައިލުމަށް ދިވެހި ސަރުކާރާއި އިންޑިއާ ސަރުކާރުން އެއްބަސްވެފައިވާ ގޮތުގެ މަތިން، ރާއްޖެއިން ފައިބަން ހަމަޖެހިފައިވާ ދެވަނަ ގްރޫޕު މި މަހު ނުވަވަނަ ދުވަހު އެނބުރީ އިންޑިއާއަށް ފޮނުވާލާފައިވާ ކަމަށެވެ.
ނަމަވެސް އިތުރު ތަފްސީލެއް ރައީސް ނުދެއްވައެވެ.
ރާއްޖޭގައި ތިބި އިންޑިއާ ސިފައިން އަނބުރާ ފޮނުވާލުމަކީ ރައީސް ޑރ މުހައްމަދު މުއިއްޒުގެ ރިޔާސީ ވައުދުފުޅެކެވެ. އެގޮތުން ރާއްޖޭގައި ތިބި އިންޑިއާ ސިފައިންގެ ފުރަތަމަ ޕްލެޓޫން މިދިޔަ މަހުގެ 10 ވަނަ ދުވަހު ރާއްޖެއިން ފައިބާފައި އެވެ. އެއީ އައްޑޫ ސިޓީގައި ގާއިމުވެތިބި އިންޑިއާ ސިފައިންނެވެ.
އިންޑިއާ ސިފައިންގެ ދެވަނަ ގްރޫޕު ރާއްޖެއިން ފޭބުމާއި ގުޅިގެން ދިވެހި އަސްކަރިއްޔާއާއި ޑިފެންސް މިނިސްޓްރީއިން އެއްވެސް މައުލޫމާތެއް ހިއްސާކޮށްފައެއް އަދި މިހާތަނަށް ނުވެއެވެ.
ސަރުކާރުން ހާމަކޮށްފައިވާ ގޮތުގައި ރާއްޖޭގައި ތިބި އިންޑިއާ ހުރިހާ ސިފައިން އަންނަ މަހުގެ 10 ގެ ކުރިން އެއްކޮށް ފައިބާނެއެވެ.
ފަހުގެ
