ރިޔާސީ އިންތިހާބުގައި ކުރި ދަތުރުތަކަށް ފައިސާ ނުދައްކައިގެން މޯލްޑިވިއަނުން އެމްޑީޕީއާއި ދެކޮޅަށް ކޯޓަށް!

ނިމިދިޔަ ރިޔާސީ އިންތިހާބުގައި އެމްޑީޕީން ރަށްރަށަށް ކުރި ކެމްޕެއިން ދަތުރުތަކުގެ ތެރެއިން ހިދުމަތަށް ދިން ގިނަ އަދަދެއްގެ ފައިސާ ނުދައްކައިގެން ގައުމީ އެއާލައިން މޯލްޑިވިއަން އިން، އެ މައްސަލަ ސިވިލް ކޯޓަށް މިއަދު ހުށަހަޅައިފިއެވެ.

މޯލްޑިވިއަންގެ އިސް އޮފިޝަލަކު މިރޭ ބުނީ ރިޔާސީ އިންތިހާބުގެ ކެމްޕެއިންއަށް އެމްޑީޕީއިން ކުރި ދަތުރުތަކަށް އެކުންފުންޏަށް 5.6 މިލިއަން ރުފިޔާ ދައްކަން ޖެހޭ ކަމަށެވެ. އެގޮތުން މި ފައިސާއަކީ ރިޔާސީ އިންތިހާބުގެ ދެވަނަ ބުރުގައި އެޕާޓީއިން ކުރި ދަތުރުތަކަކަށް އަރާފައިވާ ފައިސާގެ އަދަދު ކަމަށް ވެސް އޮފިޝަލް ވިދާޅުވިއެވެ..

އޮފިޝަލް ވިދާޅުވީ މިފައިސާތައް ހޯދުމަށްޓަކައި އެމްޑީޕީއަށް ވަރަށް ގިނަ ފުރުސަތުތައް ދީފައިވާ ކަމަށާއި މިދިޔަ ފެބްރުއަރީ މަހުގެ 8 ވަނަ ދުވަހުގައި ވެސް އެމްޑީޕީއަށް ސިޓީއަކުން ފައިސާ ދައްކާ ހަލާސްކުރުމަށް އަންގާފައިވާ ކަމަށެވެ. އެގޮތުން އެސިޓީގައި ފައިސާ ނުދައްކައިފި ނަމަ ޝަރުއީ މަރުހަލާގެ ތެރެއިން ފައިސާ ހޯދުމުގެ މަސައްކަތް ފަށާނެ ކަމުގެ އިންޒާރުވެސް ދީފައިވާނެކަން އޮފިޝަލް ފާހަގަކުރެއްވި އެވެ.

މިއާއި އެކު މިދިޔަ ސެޕްޓެމްބަރު މަހުގެ 23 ވަނަ ދުވަހުން ފެށިގެން އޮކްޓޯބަރު މަހުގެ 2 ވަނަ ދުވަހާ ދެމެދުގައި ފައިސާ ދައްކަން ޖެހޭ 10 އިންވޮއިސްއަކަށް ފައިސާ ދައްކާފައިނުވުމާއި އެކު އެމައްސަލަ މޯލްޑިވިއަންއިން މިއަދުގެ ވަގުތެއްގައި ސިވިލް ކޯޓަށް ހުށަހަޅާފައިވާކަން އޮފިޝަލް ކަށަވަރުކޮށްދެއްވި އެވެ.

އިންތިހާބުތަކާއި ދިމާކޮށް ސިޔާސީ ޕާޓީތަކުން ކްރެޑިޓަށް މޯލްޑިވިއަންއިން ހިދުމަތް ހޯދައި ފަހުން ފައިސާ ނުދައްކާ މައްސަލަތައް މީގެ ކުރިންވެސް ވަނީ ފެންމަތިވެފައި އެވެ.