ސިޓީތަކާއި އަތޮޅުތަކުގައި ޕާސްޕޯޓް ލިބޭނެ އިންތިޒާމް ހަމަޖައްސަނީ

ސިޓީތަކާއި އަތޮޅުތަކުގައި ޕާސްޕޯޓް ލިބޭނެ އިންތިޒާމް ހަމަޖެއްސުމުގެ މަސައްކަތް ކުރަމުންދާކަން ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާއި ބެހޭ ވުޒާރާއިން ބުނެފި އެވެ.

ސިޓީތަކާއި އަތޮޅުތަކުގައި ޕާސްޕޯޓް ލިބޭނެ އިންތިޒާމް ހަމަޖެއްސުމާ ގުޅޭގޮތުން ބޭއްވި ނޫސްވެރިންގެ ބައްދަލުވުމުގައި ވަޒީރު އާދަމް ޝަރީފް އުމަރު ވިދާޅުވީ ސިޓީތަކާއި އަތޮޅުތަކުގައި ޕާސްޕޯޓް ހެއްދޭނެ އިންތިޒާމް ރައީސްގެ އިރުޝާދާއެކު ކުރިއަށްގެންދަވާކަމަށެވެ.

ފިޔަވަހިތަކަކަށް ބަހާލައިގެން ފުޅާ ކުރަމުންދާ މިހިދުމަތަށް މިހާރުވެސް ބައެއް އަތޮޅު ކައުންސިލް އަދި ސިޓީތަކުން ޝައުގުވެރިކަން ފާޅުކޮށްފައިވާކަމަށް ވަޒީރު ވިދާޅުވިއެވެ. މިކަމުގެ ސަބަބުން އަތޮޅު ކައުންސިލްތަކާއި ސިޓީތަށް ވަރަށް ބޮޑަށް ބާރުވެރިވެގެންދާނެކަމަށް ވަޒީރު ވިދާޅުވިއެވެ.

ނޫސްވެރިންގެ ބައްދަލުވުމުގައި ކޮންޓްރޯލަރ ޖެނެރަލް އޮފް އިމިގްރޭޝަން މުޙައްމަދު ޝަމްއާން ވަހީދު ވިދާޅުވީ ޕާސްޕޯޓް ނަގަން މާލެ އަންނަން ޖެހުމަކީ ބޮޑު ހަރަދެއް ހިންގާކަމެއްކަން ފާހަގަކުރައްވާފައެވެ. ޕާސްޕޯޓް ހެދުމަށް ހިނގާ ހަރަދަށްވުރެ ޕާސްޕޯޓް ނެގުމަށް ހިނގާ ހަރަދު ބޮޑުކަމަށެވެ. މިގޮތުން މާލެ އައިސް ޕާސްޕޯޓް ނެގުމަށް ގާތްގަނޑަކަށް 5000 އާއި 6000 އާއި ދެމެދުގެ އަދަދެއް ހަރަދު ކުރާ ކަމަށެވެ.

ރައީސް މުއިއްޒުގެ ވެރިކަމާއި އެކު އިމިގްރޭޝަންގެ ހިދުމަތްތަކަށްވެސް އަންނަނީ ބޮޑެތި ބަދަލުތަކެއް ގެނެސް ރައްޔިތުންނަށް ދިމާވާ ދަތިތައް ފިލުވުމަށްޓަކައި ގިނަ މަސައްކަތްތަކެއް ކުރަމުންނެވެ