ޑެޕިއުޓީ މޭޔަރު ނަރީޝްއަށް ހަމަލާދިން ކަމަށް ބެލެވޭ މީހާ ހައްޔަރުކޮށްފި

މާލެ ސިޓީ ޑެޕިއުޓީ މޭޔަރު އަހުމަދު ނަރީޝްއަށް ގއ މާމެންދޫއިން ހަމަލާދިން ކަމަށް ބުނާ މީހާ ފުލުހުން ހައްޔަރުކޮށްފި އެވެ.

ފުލުހުންގެ ތަރުޖަމާނު އަހުމަދު ޝިފާން މިރޭ ވިދާޅުވީ ގއ މާމެންދޫގައި މާލެ ސިޓީ ޑެޕިއުޓީ މޭޔަރު އަހުމަދު ނަރީޝް އަށް ހަަމަލާ ދިން ކަމަށް ތުހުމަތުކުރެވޭ ފަރާތް ފުލުންގެ ބެލުމުގެދަށަށް ގެނެސްފައިވާ ކަމަށެވެ.

އަދި އެމައްސަލަ ތަހުގީގު ކުރަމުން އަންނަކަންވެސް ތަރުޖަމާނު ފާހަގަކުރެއްވި އެވެ.

"ގާފު" އަށް މައުލޫމާތު ދެމުން ފުލުހުންގެ މީޑިއާ އޮފިޝަލް ވިދާޅުވީ, މާމެންދޫގައި މާލެ ސިޓީ ޑެޕިއުޓީ މޭޔަރު އަހުމަދު ނަރީޝް އަށް ހަަމަލާ ދިން މައްސަލައެއް މިއަދު ހަވީރު 17:00 އެހާކަންހާއިރު ފުލުހުންނަށް ހުށަހަޅާފައިވާ ކަމަށެވެ.

މައުލޫމާތު ލިބިފައިވާ ގޮތުގައި ނަރީޝް އަށް ހަމަލާދީފައިވަނީ މަޖިލިސް އިންތިޚާބުގައި ކޮލަމާފުށި ދާއިރާއަށް ވާދަކުރައްވާ ޕީއެންސީގެ ކެންޑިޑޭޓްއަށް ތާއީދު ހޯއްދެވުމަށް މާމެންދޫއަށް ވަޑައިގެން އުޅުއްވަނިކޮށެވެ.