ގެދޮރުވެރިކަމުގެ މަޝްރޫއުތަކުން އިސްރަށްވެހިންނަށް އިސްކަންދޭނެ - ރައީސް

ގެދޮރުވެރިކަމުގެ މަޝްރޫއުތަކުން އިސްރަށްވެހިންނަށް ފުރުސަތު ފަހިކޮށްދެއްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ، އިސްރަށްވެހިންގެ ފުރަތަމަ އިޖުތިމާއީ މަރުކަޒު "އިސްރަށްވެހިންގެ ނާދީ" ހުޅުވުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.

ރައީސް ވިދާޅުވީ، ސަރުކާރުން މީގެ ކުރިން އަޅާނުލެވި ވާ ފަރާތްތަކަށް މިސަރުކާރުން ހާއްސަ ސަމާލުކަމެއް ދީގެން އެކިކަހަލަ ވަސީލަތްތައް ފޯރުކޮށްދިނުމަށް މިސަރުކާރުން މަސައްކަތްކުރަމުން އަންނަ ކަމަށެވެ. އެގޮތުން އިސްރަށްވެހިންނާއި، ހާއްސަ އެހީއަށް ބޭނުންވާ މީހުންނާއި، އަދިވެސް ސަރުކާރުން މީގެ ކުރިން އަޅާނުލެވިވާ ފަރާތްތަކަށް ސަމާލުކަން ދިނުމުގައި ބުރަ މަސައްކަތެއް އިޖުތިމާއީ އަދި އާއިލީ ތަރައްގީއާ ބެހޭ ވުޒާރާއިން މެންޑޭޓްްގައިވެސް ހިމެނޭނެ ކަން ރައީސް ވަނީ ފާހަގަކުރައްވާފައެވެ.

ރައީސް ވިދާޅުވީ، ގެދޮރު މައްސަލައިގައިވެސް ގޮތްތަކެއް ނިންމާފައިވާ ކަމަަށާއި، ގެދޮރު އެޅުމުގެ މަޝްރޫއުތައް ކުރިއަށްގެންދާއިރު، އެކި ކަހަލަ ޝަރުުތުތަކާއި، ކެޓެގަރީތައް ކަނޑައަޅާއިރު، ހަވާސާ ކުރެވިފައިވާ ފަރާތްތަކަށް ސަމާލުކަން ދެއްވާނެ ކަމަށެވެ. އެކަމަށްޓަކައި މަޖިލީހަށް ހުށަހެޅުމަށް ބިލެއް ފަރުމާކުރަމުން އަންނަ ކަމަށް ރައީސް ވަނީ ފާހަގަކުރައްވާފައެވެ.

މި ސަރުކާރުން ގާއިމް ކުރާ ގެދޮރުގެ މަޝްރޫއުތަކުގައި އިސްރަށްވެހިންނަށްވެސް ފުރުސަތު ފަހިވެގެން ދާނެ ކަމަށް ރައީސް ވަނީ ވިދާޅުވެފައެވެ.

މިއަދު ހުޅުވިގެންދިޔަ އިސްރަށްވެހިންގެ ނާދީގައި ތަފާތު ޙިދުމަތްތައް ދިނުމަށް ހަމަޖެހިފައިވާއިރު މި ޙިދުމަތްތަކުގެ ސަބަބުން "އިސްރަށްވެހިންގެ ނާދީ" އަކީ ރައްޔިތުންނަށް ބޭނުންތެރި ޙިދުމަތްތަކެއް ލިބިގެންދާނެ ތަނަކަށް ވެގެންދިއުމަކީ އަމާޒެއްކަމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ވަނީ ބުނެފައެވެ. އިސްރަށްވެހީންނަށް ހިތްހަމަޖެހުމާއި އުފާވެރިކަން ޔަޤީން ކޮށްދިނުމަށްޓަކައި ތަފާތު ޚިދުމަތްތައް ހިމެނޭގޮތަށް ރާއްޖޭގެ އުތުރާއި ދެކުނާއި އަދި މެދުރާއްޖެތެރޭގައި މަރުކަޒުތަކެއް ޤާއިމުކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅެކެވެ.