ފަންނީ އުފާ އަންނަ ހުކުރު ދުވަހު މާލޭގައި!

ޔޫތު މިނިސްޓްރީއިން އިސްނަގައިގެން ފަންނާނުންނަށް ޚާއްސަ ކޮށްގެން ކުރިޔަށް ގެންދިޔުމަށް ނިންމާފައިވާ "ފަންނީ އުފާ " އިވެންޓު އަންނަ ހުކުރު ދުވަހު ބޭއްވުމަށް ނިންމައިފި އެވެ.

ޔޫތު މިނިސްޓްރީއިން ބުނީ ފަންނީ އުފާ ހަރަކާތަކީވެހި ފަންނާނުންނަށް އެ މީހުންގެ ހުނަރު ދައްކާލައި، އޯޑިއަންސާ އޮންނަ ގުޅުން ބަދަހިކޮށް ދިނުމުގެ މަގްސަދުގައި ބާއްވާ ހަރަކާތެއް ކަމަށެވެ. އަދި މިއީ ފަންނާނުންނަށް އެ މީހުންގެ ހުނަރު ދައްކައިލަން ފަހިކޮށްދެވޭ އާ ޕްލެޓްފޯމެއް ކަމަށް ވެސް މިނިސްޓްރީން ބުންޏެވެ.

ފަންނީ އުފާ ހަރަކާތުގެ ލޯގޯ ރަސްމީކޮށް ރޭ ވަނީ ދައްކާލާފައި އެވެ. އެގޮތުން މި ހަރަކާތަކީ އެކި ފަންނުވެރިންގެ ފަންނާއި ހުނަރު ދައްކާލުމަށްޓަކައި ރައީސް ޑރ މުއިއްޒުގެ ވެރިކަމުގައި ޔޫތު މިނިސްޓްރީއިން މުޅިން އަލަށް ތައާރަފްކުރި ހަރަކާތެކެވެ.

މި ހަރަކާތުގެ ފުރަތަމަ އިވެންޓު އަންނަ ހުކުރު ދުވަހު ބޭއްވުމަށް ނިންމާފައިވަނީ މާލޭގެ ސޯޝަލް ސެންޓަރު ގައި އެވެ. މި ހަރަކާތް ކުރިޔަށް ގެންދިޔުމަށް ހަމަޖެހިފައިވަނީ ދެ ދަންފަޅިއަކަށް ބަހާލައިގެންނެވެ. އެގޮތުން ފުރަތަމަ ދަންފަޅި ހުކުރު ދުވަހުގެ ހަވީރު 16:00 އިން ފެށިގެން އިއުއޮއްސި 18:00 އާއި ހަމައަށް ކުރިޔަށް ގެންދާއިރު ދެވަނަ ދަންފަޅި ކުރިޔަށް ގެންދިޔުމަށް ތާވަލުކޮށްފައިވަނީ އެރޭ 20:30 އިން ފެށިގެން 23:00 އާއި ހަމައަށެވެ.

މި ހަރަކާތަކީ ސިލްސިލާ ގޮތެއްގައި ކުރިޔަށް ގެންދިޔުމަށް ހަމަޖެހިފައިވާ ހަރަކާތަކަށް ވާއިރު މާލޭގެ އިތުރުން ރާއްޖޭގެ އެކި ކަންކޮޅުތަކުގައިިވެސް މި ހަރަކާތް ކުރިޔަށް ގެންދިޔުމަށް ނިންމާފައިވާކަން ޔޫތު މިނިސްޓްރީން ވަނީ ހާމަކޮށްފައެވެ.