އިންޑިއާ ސިފައިން އަނެއްކާވެސް ދިވެހި މަސްދޯންޏަކަށް އަރައިފި

އިންޑިއާ ސިފައިން އަނެއްކާވެސް ދިވެހި މަސްދޯންޏަކަށް އަރާ ބިރުދެެއްކި މައްސަލައެއް ފެންމަތިވެއްޖެއެވެ.

އިންޑިއާ ސިފައިން މިމަހުގެ 1ވަނަ ދުވަހުގެ ރޭ އަރާފައިވަނީ ހއ. އިހަވަންދޫ "މާހޯރަ 3" އަށެވެ. މި ދޯންޏަށް އަރާފައިވަނީ މީގެ ކުރިންވެސް ދިވެހި ކަނޑުގެ ސަރަހައްދުގައި ހަރަކާތްތެރިވަމުން ދިޔަ 3 މަސްދޯންޏަކަށް ގަވާއިދާ ހިލާފަށް އިންޑިއާ ސިފައިން އެރި މައްސަލަ ހޫނުވެފައިވަނިކޮށެވެ.

އިންޑިއާ ސިފައިން ދިވެހި މަސްދޯނިތަކަށް އަރާފައިވަނީ ހަތިޔާރާއެކުގައެވެ. ބޮޑު ކަންނެލި މަސްވެރިންގެ ޔުނިއަން އިން ބުނީ ފެބްރުއަރީ އެއް ވަނަ ދުވަހު ގެރޭ އެ ދޯނި ދަތުރު ކުރަމުން ދަނިކޮށް މޮޅަދޫ ބޮޔާއި ތިން މޭލު ހިސާބުން ރޭގަނޑު 12 ޖެހިއިރު އިންޑިޔާގެ މަނަވަރެއް ކައިރިކޮށް ދޯންޏަށް އަރާ މަސްވެރިންނަށް ބިރު ދައްކާފައިވާ ކަމަށެވެ. އަދި މި މައްސަލަ ދޯނީގެ ވެރި ފަރާތުން ރިޕޯޓްކޮށްފައިވާ ކަމަށްވެސް ބުނެފައި ވެއެވެ.

ރޭ ދިފާއީ ވުޒާރާއިން ނެރުނު ބަޔާނެއްގައި ބުނެފައިވަނީ، ރާއްޖޭގެ އިގްތިސޯދީ ސަރަހައްދުގައި މަސްވެރިކަން ކުރަމުންދިޔަ ދިވެހި މަސްދޯނި ތަކަށް ކަމާ ގުޅޭ އެއްވެސް އިދާރާއަކާއި ކޯޑިނޭޓް ކުރުމެއް ނެތި ބައިނަލްއަގްވާމީ ކަނޑުގެ ގާނޫނުތަކާއި އުސޫލުތަކާއި ހިލާފަށް އިންޑިއާގެ އަސްކަރިއްޔާގެ ބޯޑުކޮށް ހިންގި އޮޕަރޭޝަންގެ ތަފްސީލު ދިނުމަށް ރާއްޖޭގެ ހާރިޖީ ވުޒާރާ މެދުވެރިކޮށް އިންޑިއާ ސަރުކާރުގައި ރަސްމީކޮށް ދަންނަވާފައިވާނެ ކަމަށެވެ.