އައްޑޫގައި އިތުރު އެކްސިޑެންޓެއް، ކާރެއް ގޮސް އެރީ ފާރަށް!

އައްޑޫ ސިޓީގައި މިރޭ ދެވަނަ އެކްސިޑެންޓެއް ހިނގައިފިއެވެ.

މައުލޫމާތު ލިބޭ ގޮތުގައި އެ އެކްސިޑެންޓު ހިނގާފައިވަނީ ބާރު ސްޕީޑުގައި ދުއްވާފައި ދިޔަ ކާރެއް، ކޮންޓްރޯލް ނުވެ ފާރަކަށް އަރައިގެންނެވެ.

މި އެކްސިޑެންޓް ހިނގާފައިވަނީ އައްޑޫ އާރްއޭއެފް ސަރަހައްދުގައި ހަދަމުން އަންނަ ޕޮލިސް ޓްރެއިނިން ސްކޫލުގައި ފާރުގައި ޖެހިގެން ކަމަށް މައުލޫމާތު ލިބެއެވެ. އަދި އެކްސިޑެންޓުގައި މީހަކަށް އަނިޔާވި ކަމުގެ މައުލޫމާތެއް އަދި ނުލިބެއެވެ.

އާރްއޭއެފް ސަރަހައްދުގައި އެކްސިޑެންޓެއް ހިނގާފައިވާއިރު، ހިތަދޫ ލިންކް ރޯޑުގައި ވެސް ބާރު ސްޕީޑުގައި ދުއްވާފައި ދިޔަ ކާރެއް ފުރޮޅާލައިގެން ވަނީ ނުރައްކާތެރި އެކްސިޑެންޓެއް ހިނގާފައެވެ. އެ އެކްސިޑެންޓުގައި ކާރުގައި އިން މީހަކަށް އަނިޔާވެފައިވާ ކަމަށް މައުލޫމާތު ލިބެއެވެ.

ނަމަވެސް މި ދެ އެކްސިޑެންޓާ ގުޅިގެންވެސް ފުލުހުންގެ ބަހެއް އަދި ނުލިބެއެވެ.