ގައްދޫ ކައުންސިލް ފުޓްސަލް ޗެލެންޗުގެ ޓައިޓަލް ސްޕޮސަރަކަށް ސައުދީ އެމްބަސީ!
ޝައުފާ އިސްމާއިލް
12/1/2022, 4:47:20 PM
Fi4z4h6UcAAxMZa
މިމަހުގެ ފަހު ކޮޅު ގައްދޫގައި ފަށާ ގައްދޫ ކައުންސިލް ފުޓްސަލް ޗެލެންޖުގެ ޓައިޓަލް ސްޕޮންސަރަކަށް ރާއްޖޭގައި ހުންނަ ސައުދީ އަރަބިއާގެ އެމްބަސީ ހަމަޖައްސައިފި އެވެ.
ގައްދޫ ކައުންސިލުން ބާއްވާ މި މުބާރާތުގެ ޓައިޓަލް ސްޕޮންސަރަކަށް ސައުދީ އެމްބަސީ ހަމަޖެއްސީ މިއަދުގެ ވަގުތެއްގައި އެވެ. މި އެއްބަސްވުމުގައި ގައްދޫ ކައުންސިލާއި ސައުދީ އެމްބަސީއިން މިއަދު ވަނީ ސޮއިކޮށްފައެވެ.
ސައުދީ އެމްބަސީގައި އޮތް ރަސްމިއްޔާތެއްގައި ގައްދޫ ކައުންސިލްގެ ފަރާތުން ސޮއިކުރެއްވީ ގައްދޫ ކައުންސިލްގެ ރައީސް މުހައްމަދު އަހުމަދު އެވެ. އަދި ސައުދީ އެމްބަސީގެ ފަރާތުން ސޮއި ކުރެއްވީ އެ ގައުމުން ރާއްޖެއަށް ކަނޑައަޅާފައި ހުންނަވާ އެމްބެސެޑަރު، މަތްރެކް ބިން ޢަބްދުﷲ އަލްޢަޖާލީން އަލްދައުސަރީއެވެ.
ސައުދީ އެމްބަސީއިން މައުލޫމާތު ދޭގޮތުގައި މި ސްޕޮންސަރޝިޕަކީ ޒުވާނުންގެ މެދުގައި ކުޅިވަރު ކުރިއެރުވުމާއި، ރާއްޖޭގެ އެކި ކަންކޮޅުތަކުގައި ދުޅަހެޔޮ ދިރިއުޅުމަކަށް ބާރު އެޅުމުގެ ގޮތުން ގައްދޫ ކައުންސިލަށް ދެވުނު ސްޕޮންސަރޝިޕެކެވެ.
ގައްދޫ ކައުންސިލް ފުޓްސަލް ޗެލެންޖު ބޭއްވުމަށް ތައްޔާރުވަމުން އަންނަނި މިމަހުގެ 22 ވަނަ ދުވަހު ފެށުމަށެވެ. މި މުބާރާތަކީ ދެ ޖިންސުގެ ފަރާތްތަކަށްވެސް ހުޅުވާލައިގެން ބާއްވާ މުބާރާތެކެވެ.