ބުއްދިއާއި ވިސްނުން ތަރައްޤީކޮށްދެނީ ތަޢުލީމުން - ރައީސްް

އިންސާނާގެ ބުއްދިއާއި ވިސްނުން ތަރައްގީކޮށްދެނީ ތަޢުލީމުން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.

ރައީސް ސޯލިހު މިހެން ވިދާޅުވީ، ޤައުމީ ޒުވާނުންގެ ދުވަސް ފާހަގަކުރުމަށް ބޭއްވި ރަސްމީ ޖަލްސާގައި ވާހަކަފުޅުދައްކަވަމުންނެވެ. ރައީސް ސޯލިހު ވިދާޅުވީ، މީގެ ހަތަރު އަހަރު ކުރިން، ރައްޔިތުންނަށް ޚިދުމަތް ކުރުމާ މިސަރުކާރުން ޙަވާލުވުމަށް ފަހު، އެންމެ ފުޅާ ދާއިރާއެއްގައި ސަރުކާރުން ހުޅުވައިލަދިނީ ތަޢުލީމުގެ ފުރުޞަތުކަމަށެވެ.

އޭގެ ބޭނުމަކީ، ޒުވާނުންގެ ބުއްދިއާއި ވިސްނުން ތަރައްޤީކޮށްދިނުން ކަމަށާއި، ޒަމާނީ ޢިލްމުގެ އަލީގައި ޓެކްނޮލޮޖީގެ ރާސްތާގައި ޤައުމައިގެން ކުރިއަށް މިސްރާބު ހިފާނެ ޒުވާން ޖީލެއް ބިނާކުރުން ކަމަށެވެ.

ދިވެހިރާއްޖޭގެ ޤައުމީ ޔުނިވަސިޓީގެ ފަރާތުން، މި ޖަލްސާގައި އެ ހުށަހެޅުއްވި ދިރާސާގައިވެސް، ޒުވާނުންނާ ބެހޭގޮތުން ޙައްލު ހޯދަންޖެހިފައިވާ ވަރަށް ގިނަ ކަންތައް ފާހަގަކުރައްވައިފި. އަޅުގަނޑު ހިތުން އެބޭފުޅުން ދިރާސާ އެ ހެއްދެވީ ވަރަށް މުނާސަބު ދުވަސްވަރެއްގައި. އަޅުގަނޑުމެންނަށްވެސް އެކަން ފާހަގަކުރެވި، އެ ކަންކަން ޙައްލުކުރުމުގެ މަސައްކަތް ސަރުކާރުން މިއަންނަނީ ކުރަމުން. - ރައީސް ސޯލިހު ވިދާޅުވިއެވެ.

މިއަހަރުގެ ޒުވާނުންގެ އެވޯޑު 9 ދާއިރާއަކުން 10 ފަރާތަކަށް ވަނީ ދީފައެވެ. މި އެވޯޑަކީ ޤައުމުގެ ކުރިއެރުމާ، މުޖުތަމަޢުގެ ލާބައާއި މަންފާއަށް ޒުވާނުން ކުރަމުންދާ މަސައްކަތް ފާހަގަކޮށް، ޤައުމީ ފެންވަރުގައި ޒުވާނުންނަށް ދޭ އެންމެ ޝަރަފުވެރި އެވޯޑެވެ.

ޤައުމީ ޒުވާނުންގެ ދުވަސް ފާހަގަކުރުމާއި، ޒުވާނުންގެ އެވޯޑް ދިނުމަށް ސަރުކާރުން ނިންމާފައިވަނީ އެކި ދާއިރާތަކުން ޒުވާނުން ކުރަމުން އަންނަ މަސައްކަތްތަކުގެ އަގު ވަޒަންކުރުމުގެ ގޮތުންނެވެ. އަދި ޒުވާނުންނަކީ ޒިންމާދާރު ބަޔަކަށް ހެދުމާއި، ޤައުމުގެ ކުރިއެރުމަށް މަސައްކަތްކުރާ ހަރުދަނާ ބަޔަކަށް ހެދުމާއި، އަދި ތަފާތު ދާއިރާތަކުން ޒުވާނުންނަށް ކުރިއަރައިގެން ދެވޭނެ ފުރުޞަތުތަކާމެދު ޒުވާނުން ހޭލުންތެރިކުރުމަކީވެސް ސަރުކާރުން މިއެވޯޑް ދިނުމުގެ މަޤްސަދެކެވެ.

ކޮންމެ އަހަރެއްގެ އޮކްޓޯބަރުމަހުގެ 22 ވަނަ ދުވަސް، ޒުވާނުންގެ ދުވަހުގެ ގޮތުގައި ޤައުމީ ފެންވަރުގައި ފާހަގަކުރުމަށް، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ކަނޑައެޅުއްވީ 19 ޑިސެމްބަރު 2019 ގައެވެ.