ދިރާސާ ނިމުމާއެކު ސިއްހީ ދާއިރާގެ މުވައްޒަފުންގެ މުސާރަ ބޮޑުކުރާނެ - ރައީސް އޮފީސް

ޕޭ ކޮމިޝަނުން މިހާރު ކުރަމުންދާ ދިރާސާގެ މަސައްކަތް ނިމުމުހާ އަވަހަކަށް ސިއްހީ ދާއިރާގައި މަސައްކަތް ކުރާ މުވައްޒަފުންގެ މުސާރަ ބޮޑުކުރާނެ ކަމަށް ރައީސް އޮފީހުން ބުނެފިއެވެ.

ރައީސް އޮފީހުގެ ތަރުޖަމާނު މިއުވާން މުހައްމަދު މިއަދު ނޫސްވެރިންނާ ބައްދަލުކުރައްވާ ވިދާޅުވީ ސިއްހީ ދާއިރާގެ މުވައްޒަފުންގެ މުސާރަ ބޮޑުކުރުމާއި ގުޅޭ ގޮތުން ޕޭ ކޮމިޝަނުން ދިރާސާތަކެއް ކުރަމުންދާ ކަމަށެވެ.

އެގޮތުން ސިއްހީ ދާއިރާގެ އިތުރުން ޖުމްލަ ގޮތެއްގައި ދައުލަތުގެ މުސާރަތައް އެއްހަމަ ކުރުމަށްޓަކައި ކުރަންޖެހޭ މަސައްކަތްތައް ޕޭ ކޮމިޝަނުން ކުރަމުންގެންދާ ކަމަށްވެސް މިއުވާން ވިދާޅުވިއެވެ.

ސިއްހީ ދާއިރާގެ މުވައްޒަފުންގެ މުސާރަ ބޮޑުކުރާނެ ތާރީހެއް އަދި ހާމައެއް ނުކުރެ އެވެ. އެކަމަކު މުސާރައިގެ ހެޔޮ ބަދަލު ދެން އެންމެ އަވަހަށް ގެންނާނީ ސިއްހީ ދާއިރާގެ މުވައްޒަފުންނަށް ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވަނީ، ލ. ގަމުގައި ކުރިއަށް ދިޔަ ވިއަވަތި ރާއްޖެ ކޮންފަރެންސްފައި އިއުލާނުކުރަވާފައެވެ.

ރައީސް ވިދާޅުވި ގޮތުގައި ސިއްހީ ނިޒާމަކީ ގޮންޖެހުންތަކާއިއެކު އަދިވެސް ފުރިހަމަކުރަން ޖެހިފައިވާ ނިޒާމެކެވެ. ރާއްޖޭގެ ސިއްހީ ދާއިރާގައި މަސައްކަތް ކުރާ މުވައްޒަފުންގެ މުސާރަތައް ބޮޑުކުރުމަށްޓަކައި ހަދަންޖެހޭ ދިރާސާ މިއަހަރު ނިންމުމަށްފަހު އެ ދާއިރާގެ މުވައްޒަފުންގެ މުސާރަ ބޮޑުކުރައްވާނެ ކަމަށް މީގެ ކުރިން ވެސް ރައީސް ވިދާޅުވެފައިވެ އެވެ.

ސަރުކާރުން ވަނީ ތައުލީމީ ދާއިރާގެ މުވައްޒަފުންގެ މުސާރަ ބޮޑުކޮށްފަ އެވެ. އެ ބަދަލާއެކު ގިނަ ޓީޗަރުންގެ މުސާރަތައް ވަނީ 20،000 ރުފިޔާއާ ގާތްކުރާ އަދަދކަށް ބޮޑުވެފަ އެވެ.