އެކި މުވައްސަސާތަކުގެ ނަމުގައި ސްކޭމް މެސެޖްތަކެއް ދައުރުކުރާތީ ސަމާލުވުމަށް އެދިއްޖެ

ސަރުކާރުގެ އެކި މުވައްސަސާތަކުގެ ނަމުގައި ސްކޭމް މެސެޖްތަކެއް ދައުރުކުރާތީ ސަމާލުވުމަށް ފުލުހުން އެދިއްޖެ އެވެ.

ފުލުހުން މިއަދު ކުރި ޓުވީޓެއްގައި ބުނެފައި ވަނީ އެކި މުއައްސަސާތަކުގެ ނަމުގައި ސްކޭމް މެސެޖުތަކެއް ކުރަމުންދާ ކަމުގެ މައުލޫމާތު އެ އިދާރާއަށް ލިބިފައިވާ ކަމަށެވެ.

މި މައްސަލަ މިހާރު އެ އިދާރާއިން ބަލަމުން ގެންދާކަން ފާހަގަކޮށް ފުލުހުން ބުނީ އެ މެސެޖުތަކުގައި ހިމެނޭ ލިންކުތަކަށް ނުވަނުމަށް އެދިލައްވާފައެވެ.

އެކި ކުންފުނިތަކާއި، މުވައްސަސާތަކުގެ ނަމުގައި މެސެޖްތައް ފޮނުވައި އަދި ގުޅައިގެން މަކަރާއި ހީލަތުން ފައިސާ ހޯދުމުގެ އަމަލުތައް މިހާރު ވަނީ ވަރަށް އާއްމުފައިވާތީ އެކަންކަމަށްވެސް ސަމާލުވުމަށް ކަމާބެހޭ ފަރާތްތަކުން ވަނީ ގޮވާލާފައެވެ.