މުޅި އަތޮޅުގެ ހާލަތު ގޯސްވަނީ، ގެމަނަފުށިން އަނެއްކާވެސް ކޭސްތަކެއް

ގއ. ގެމަނަފުށިން އަނެއްކާވެސް ކޮވިޑް19 އަށް ފައްސި ކޭސްތަކެއް ފެނިއްޖެ އެވެ.

ގެމަނަފުށީ ކައުންސިލުން މިއަދު އާއްމުކުރި ތަފާސް ހިސާބުތައް ދައްކާ ގޮތުގައި އެ ރަށުން އިތުރު މީހަކު ފައްސިވެ އެރަށުގެ އެކްޓިވް ކޭސްތަކުގެ އަދަދު ވަނީ 29 އަށް އަރާފައެވެ. އަދި ބަލީގެ އަލާމާތްތައް ފެނިގެން އިތުރު 7 މީހަކާއި ހޯމް ކަރަންޓީނުގައި ހުރި 2 މީހެއްގެ ސާމްޕަލް ނަގައި ޓެސްޓު ކުރުމަށް ފޮނުވާފައިވާ ކަމަށްވެސް އެކައުންސިލުން ބުނެފައިވެއެވެ.

އެ ކައުންސިލުން ހާމަކޮށްފައިވާ ގޮތުގައި މިވަގުތު ނަތީޖާ ނުލިބި ހުރި 15 ސާމްޕަލެއް އެބަހުއްޓެވެ.

މިހާތަނަށް ގެމަނަފުށިން 29 މީހަކު ފައްސިވެފައިވާއިރު 25 ފަރާތަކީ ރަށު ތެރެއިން ފެނުނު ކޭސްތަކެކެވެ. 4 ކޭސް އަކީ ހޯމް ކަރަންޓީން ކޭސްތަކެކެވެ.

ހަލުވި ކަމާއި އެކު ގެމަނަފުށީގައި މި ބަލި ފެތުރެމުން ދާއިރު އެރަށް ވަނީ މޮނީޓަރިންގ ހާލަތަށް ވެސް ގެނެސްފައެވެ.

ގެމަނަފުށީގެ އިތުރުން އެ އަތޮޅުގެ ވެރިކަން ކުރާ ވިލިނގިއްޔާއި ދާންދޫ، ވެސް އޮތީ މޮނިޓަރިންގެ ހާލަތުގައެވެ. އެއަތޮޅުގެ 5 ރަށަކުން ބަލި ފެނިފައިވާއިރު އެއަތޮޅުގެ އެކްޓިވް ކޭސްތަކުގެ އަދަދު މިވަނީ 125 އަށް އަރާފައެވެ.